पलूस प्रतिनिधी : पलूसच्या सांस्कृतिक भूमीत शास्त्रीय संगीत साधनेचा आणि पलुस्करांच्या महान संगीत परंपरेचा गौरव करणारा ऐतिहासिक सोहळा रविवारी उत्साहपूर्ण वातावरणात पार पडला. स्वर्गीय यशवंतराव चव्हाण स्मृती गौरव समितीचे अध्यक्ष प्रदीपआप्पा कदम यांच्या संकल्पनेतून सुरू करण्यात आलेला ‘पंडित विष्णू दिगंबर पलुस्कर जीवन गौरव पुरस्कार २०२६’ यंदा ज्येष्ठ शास्त्रीय गायक पंडित अजित कडकडे यांना अखिल भारतीय मराठी साहित्य संमेलनाचे माजी अध्यक्ष व ज्येष्ठ साहित्यिक डॉ. श्रीपाल सबनीस यांच्या हस्ते प्रदान करण्यात आला.
शिवपार्वती मल्टीपर्पज हॉल, कराड-तासगाव रोड, पलूस येथे झालेल्या या पुरस्कार सोहळ्याला संगीत, साहित्य, कला, सामाजिक व सांस्कृतिक क्षेत्रातील मान्यवरांसह मोठ्या संख्येने रसिक उपस्थित होते. पुरस्काराचे स्वरूप मानपत्र, रोख रक्कम, वीणा व तबल्याचे प्रतीक असलेले यशवंतराव चव्हाण स्मृती गौरवचिन्ह, शाल व श्रीफळ असे होते.
पंडित अजित कडकडे यांनी भारतीय शास्त्रीय संगीत तसेच भक्तिसंगीत क्षेत्रात प्रदीर्घ काळ केलेल्या उल्लेखनीय संगीतसेवेचा यावेळी गौरव करण्यात आला. पंडित जितेंद्र अभिषेकी यांच्या तालमीत संगीताचे शिक्षण घेतलेल्या कडकडे यांनी शास्त्रीय संगीतासोबतच भावगीत, अभंग आणि भक्तिसंगीताच्या क्षेत्रात आपल्या वैशिष्ट्यपूर्ण गायकीचा स्वतंत्र ठसा उमटविला आहे. त्यांच्या भारदस्त, मधुर आणि भावपूर्ण आवाजाने महाराष्ट्रासह देश-विदेशातील रसिकांना मंत्रमुग्ध केले आहे.
कार्यक्रमाच्या प्रारंभी सर्व मान्यवरांच्या शुभहस्ते दीपप्रज्वलन करण्यात आले. नटराज मूर्ती, सरस्वती मातेची प्रतिमा, पंडित विष्णू दिगंबर पलुस्कर, स्व. यशवंतराव चव्हाण तसेच स्व. अजितदादा पवार यांच्या प्रतिमांचे पूजन करण्यात आले. मिरज येथील गंधर्व महाविद्यालयाच्या विद्यार्थिनींनी सादर केलेल्या स्वागतगीताने कार्यक्रमाला सुरुवात झाली.
कार्यक्रमाचे स्वागत प्रा. शरद जाधव (हास्य यात्राकार) यांनी केले. समितीचे अध्यक्ष तथा आयोजक प्रदीपआप्पा कदम यांनी प्रास्ताविकातून पुरस्कारामागील संकल्पना स्पष्ट केली. यावेळी पंडित विष्णू दिगंबर पलुस्कर यांच्या जीवनकार्यावर आधारित चित्रफीतही प्रसारित करण्यात आली.
पलुस्करांचे कार्य पुढे नेण्याची क्षमता अजित कडकडेंमध्ये : डॉ. श्रीपाल सबनीस
यावेळी प्रमुख पाहुणे डॉ. श्रीपाल सबनीस यांनी पंडित अजित कडकडे यांच्या संगीत साधनेचा गौरव केला.
ते म्हणाले, “शास्त्रीय संगीत राजमहालातून सर्वसामान्य माणसाच्या अंगणात आणण्याचे आणि त्याला नवा आयाम देण्याचे महान कार्य पंडित विष्णू दिगंबर पलुस्कर यांनी केले. त्यांनी शास्त्रीय संगीताला नवी प्रतिष्ठा मिळवून देत त्याचा देश-विदेशात प्रसार केला. अशा महान संगीत तपस्वीच्या गावातून दिला जाणारा हा पुरस्कार सर्वोच्च दर्जाचा आहे.”
“संगीत क्षेत्रात आपले आयुष्य घालवलेल्या तपस्वी साधक पंडित अजित कडकडे यांना हा पुरस्कार देणे ही ऐतिहासिक घटना आहे. पलुस्करांचे कार्य पुढे नेण्याची क्षमता अजित कडकडे यांच्यामध्ये आहे. त्यांच्या गायकीत शास्त्रीय संगीताची परंपरा, भक्तिसंगीताची भावस्पर्शी अनुभूती आणि सुरांची समृद्धता यांचा सुंदर मिलाफ आहे,” असे गौरवोद्गार त्यांनी काढले.
पलूसच्या भूमीला पंडित विष्णू दिगंबर पलुस्कर यांच्या रूपाने लाभलेला सांस्कृतिक वारसा जपण्याची आणि तो पुढील पिढीपर्यंत पोहोचविण्याची गरजही त्यांनी व्यक्त केली.
‘हा पुरस्कार केवळ माझा नाही, माझ्यासोबतच्या प्रत्येकाचा’
पुरस्कार स्वीकारल्यानंतर पंडित अजित कडकडे यांनी आयोजक, मान्यवर आणि रसिकांचे आभार मानले.
ते म्हणाले, “पंडित विष्णू दिगंबर पलुस्कर यांच्या नावाने मिळणारा हा पुरस्कार माझ्यासाठी अभिमानाची बाब आहे. हा पुरस्कार केवळ मला मिळालेला नसून माझ्यासोबत काम करणारे कलाकार, वादक, माझे गुरु पंडित जितेंद्र अभिषेकी तसेच मला प्रेम देणाऱ्या सर्व रसिकांचा आहे. पलूससारख्या सांस्कृतिक भूमीत हा सन्मान मिळणे माझ्यासाठी अत्यंत आनंदाचा आणि अभिमानाचा क्षण आहे.”
संगीत साधनेच्या प्रदीर्घ प्रवासात रसिकांनी दिलेले प्रेम, आशीर्वाद आणि प्रोत्साहन हीच आपली खरी प्रेरणा असल्याचेही त्यांनी सांगितले.
अजित कडकडेंच्या गायनाने रसिक मंत्रमुग्ध
पुरस्कार स्वीकारल्यानंतर पंडित अजित कडकडे यांनी सादर केलेल्या सुमधुर गायनाने कार्यक्रमाला विशेष रंगत आली. त्यांच्या भारदस्त आणि मधुर आवाजातील सुरेलपणा, भावपूर्ण गायकी आणि शास्त्रीय संगीताची ताकद यामुळे उपस्थित रसिक अक्षरशः मंत्रमुग्ध झाले.
शास्त्रीय संगीत आणि भक्तिसंगीताच्या सादरीकरणाला रसिकांनी टाळ्यांच्या कडकडाटात उत्स्फूर्त दाद दिली. त्यांच्या गायनामुळे संपूर्ण सभागृहात भक्तिमय आणि संगीतमय वातावरण निर्माण झाले. त्यांच्या गायनाने कार्यक्रमाची सांगता एका अविस्मरणीय सांस्कृतिक अनुभूतीने झाली.
डॉ. स्नेहा राजुरीकर, विजयकुमार कडणे यांचाही सन्मान
‘पंडित विष्णू दिगंबर पलुस्कर जीवन स्मृती गौरव पुरस्कार २०२६’ यावेळी डॉ. स्नेहा सुभाष राजुरीकर आणि विजयकुमार बाळकृष्ण कडणे (दादा) यांना प्रदान करण्यात आला.
डॉ. स्नेहा राजुरीकर या हिंदुस्तानी शास्त्रीय गायिका, संगीत अभ्यासिका, शिक्षिका व गुरु म्हणून कार्यरत आहेत. तर विजयकुमार कडणे हे नाट्य, चित्रपट आणि आकाशवाणी क्षेत्रातील ज्येष्ठ निवेदक व सूत्रसंचालक म्हणून परिचित आहेत.
संगीत क्षेत्रातील कलाकारांचा गौरव
पलूस तालुका व परिसरातील संगीत क्षेत्रात उल्लेखनीय कार्य करणाऱ्या कलाकारांचा ‘पंडित विष्णू दिगंबर पलुस्कर सन्मानचिन्ह’ देऊन पंडित अजित कडकडे यांच्या हस्ते गौरव करण्यात आला.
यामध्ये सौ. प्राजक्ता प्रमोद कुलकर्णी, सौ. माधवी प्रसाद मोघे, सौ. वंदना धर्मेंद्र कांबळे, श्री. कैलास बाबासो सावंत, श्री. किरण अरविंद चव्हाण, श्री. भागवत सुधाकर पाटील आणि श्री. निखिल दत्तात्रय मानुगडे यांचा समावेश होता. ज्येष्ठ वादक सुरेश गुंजळे यांचाही पंडित अजित कडकडे यांच्या हस्ते सत्कार करण्यात आला.
पत्रकारिता, उद्योग व सामाजिक क्षेत्रातील मान्यवरांचा गौरव
कार्यक्रमाचे प्रमुख पाहुणे डॉ. श्रीपाल सबनीस यांचा अभिजित कौलगे यांच्या हस्ते सत्कार करण्यात आला. कार्यक्रमाचे अध्यक्ष तथा अखिल भारतीय मराठी पत्रकार परिषदेचे मुख्य विश्वस्त एस. एम. देशमुख यांचा उल्हास पाटील यांच्या हस्ते सत्कार करण्यात आला.
अखिल भारतीय मराठी पत्रकार परिषदेच्या राष्ट्रीय अध्यक्षपदी निवड झाल्याबद्दल शिवराज काटकर यांचा गणेश माने यांच्या हस्ते गौरव करण्यात आला. चितळे उद्योग समूह, भिलवडीचे संचालक विश्वास चितळे यांचा तुषार सूर्यवंशी यांच्या हस्ते सत्कार करण्यात आला.
अजित कडकडे यांना प्रदान करण्यात आलेल्या मानपत्राचे लेखन साहित्यिक तानाजीराजे जाधव यांनी केले त्याबद्दल श्रीपाद सबनीस यांच्या हस्ते त्यांचा सत्कार करण्यात आला.
सांगली जिल्हा मराठी पत्रकार संघाच्या जिल्हाध्यक्षपदी निवड झाल्याबद्दल प्रवीण शिंदे तसेच जिल्हा कार्याध्यक्षपदी निवड झाल्याबद्दल तुकाराम धायगुडे यांचा डॉ. श्रीपाल सबनीस यांच्या हस्ते सत्कार करण्यात आला.
यावेळी सागर नलवडे, अमृत माळी, प्राचार्य बी. एन. पवार, सुहास निकम, गणेश नलवडे, कृषिभूषण सुनील भोसले, दत्ता उथळे आदी मान्यवर उपस्थित होते.
‘सर्व महाराष्ट्राला असे आप्पा मिळावेत’
प्रदीपआप्पा कदम यांच्या सामाजिक व सांस्कृतिक कार्याचे कौतुक करताना डॉ. श्रीपाल सबनीस म्हणाले, “कृषी प्रदर्शनाच्या माध्यमातून शेतकऱ्यांना प्रगतीची दिशा दाखविणारे आणि नव्या पिढीने संस्कारक्षम व्हावे यासाठी विविध उपक्रम राबविणारे प्रदीपआप्पा राजकारणात आहेत, याचे आश्चर्य वाटते. समाजाच्या हितासाठी राजकारणात काम करणारे प्रदीपआप्पांसारखे नेतृत्व महाराष्ट्रात सर्वत्र मिळावे.”
पलूसच्या सांस्कृतिक ओळखीला नवा आयाम
पंडित विष्णू दिगंबर पलुस्कर हे पलूसचे सुपुत्र असून त्यांनी भारतीय शास्त्रीय संगीताला देश-विदेशात नवी दिशा व प्रतिष्ठा मिळवून दिली. त्यांच्या स्मृतींना अभिवादन करण्याबरोबरच संगीत क्षेत्रात आयुष्यभर साधना करणाऱ्या ज्येष्ठ कलाकारांचा गौरव व्हावा, भावी पिढीला संगीत साधनेची प्रेरणा मिळावी आणि पलूसची सांस्कृतिक ओळख अधिक व्यापक व्हावी, या उद्देशाने प्रदीपआप्पा कदम यांनी या जीवनगौरव पुरस्काराची संकल्पना मांडली.
पहिल्याच वर्षी हा पुरस्कार पंडित अजित कडकडे यांना प्रदान झाल्याने या उपक्रमाचे महत्त्व अधोरेखित झाले आहे. पलुस्करांच्या भूमीत सुरू झालेला हा पुरस्कार भविष्यात संगीत क्षेत्रातील गुणवंत कलाकारांसाठी प्रेरणादायी व्यासपीठ ठरेल, असा विश्वास यावेळी व्यक्त करण्यात आला.
कार्यक्रमाचे आभार अमर कुरणे यांनी मानले. संगीत, साहित्य, कला, सामाजिक व सांस्कृतिक क्षेत्रातील मान्यवर तसेच मोठ्या संख्येने उपस्थित रसिकांच्या सहभागामुळे पुरस्कार सोहळ्याला भव्य स्वरूप प्राप्त झाले.
टिप्पणी पोस्ट करा
0टिप्पण्या