मिरज, दि. २६ ऑगस्ट — छत्रपती शिवाजी महाराज रस्त्यावर रात्री दोन नशेखोर तरुणांनी कोल्हापूर-जालना दरम्यान धावणाऱ्या एसटी बसला दुचाकी आडवी लावून थांबवले. बस चालक व वाहकाला बेदम मारहाण करून प्रवाशांमध्ये भीतीचे वातावरण निर्माण झाले. या गोंधळात महात्मा गांधी चौक पोलीस ठाण्याचे कर्मचारी कोंडीबा सरगर वाद शांत करण्यासाठी घटनास्थळी पोहोचले. मात्र हल्लेखोरांनी सरगर यांच्यावर चाकूने भीषण वार करत त्यांना गंभीर जखमी केले.
सरगर यांच्या बरगडीत चाकू खुपसल्याने त्यांची प्रकृती चिंताजनक असून त्यांच्यावर मिरज शासकीय रुग्णालयात उपचार सुरू आहेत. या घटनेमुळे पोलीस दलात व नागरिकांमध्ये प्रचंड संताप व भीतीचे वातावरण निर्माण झाले आहे.
पोलिसांनी तात्काळ कारवाई करत अब्दुल्ला व सैफुल्लाह पटेल या दोन्ही आरोपींना ताब्यात घेतले. या घटनेनंतर मिरज शहरात तणावाचे वातावरण असून नागरिकांमध्ये असुरक्षिततेची भावना वाढली आहे.
गंभीर जखमी पोलीस कर्मचारी सरगर यांच्यावर तातडीने शस्त्रक्रिया करण्यात आली असून डॉक्टरांनी त्यांची प्रकृती गंभीर असल्याचे सांगितले आहे. या घटनेमुळे पोलीस दलातील सहकाऱ्यांमध्ये चिंतेचे वातावरण आहे.
ही घटना केवळ पोलीस दलावरच नव्हे तर संपूर्ण समाजावर हल्ला असल्याचे नागरिकांचे मत असून, कायदा व सुव्यवस्था राखणाऱ्या पोलीस कर्मचाऱ्यांवर अशा प्रकारचे हल्ले होणे अत्यंत धोकादायक असल्याचे स्पष्ट झाले आहे.
टिप्पणी पोस्ट करा
0टिप्पण्या