आत्मरक्षण, शिस्त आणि एकाग्रतेसाठी वुशु महत्त्वाचे : उमेश कारजोल ; खेलो इंडिया अस्मिता महिला वुशु क्रीडा स्पर्धेचे उद्घाटन

प्रतिष्ठा न्यूज / दिपक शिंत्रे 

विजयपूर : आत्मरक्षणासोबतच शिस्त, एकाग्रता आणि आत्मविश्वास निर्माण करण्यासाठी वुशु हा अत्यंत महत्त्वाचा क्रीडा प्रकार आहे, असे युवा भारत संस्थापक अध्यक्ष तथा वुशु संस्थेचे अध्यक्ष उमेश कारजोल यांनी सांगितले.

विजयपूर येथील डॉ. बाबासाहेब आंबेडकर इनडोअर स्टेडियममध्ये जिल्हा वुशु संस्था व श्रीमती मीनाक्षी कल्लूर महिला महाविद्यालय यांच्या संयुक्त विद्यमाने आयोजित खेलो इंडिया अस्मिता महिला वुशु क्रीडा स्पर्धेचे उद्घाटन कारजोल यांच्या हस्ते झाले. यावेळी ते बोलत होते.

वुशु या क्रीडा प्रकाराला जगभरात मोठी लोकप्रियता मिळत असून विजयपूर परिसरातही अनेक खेळाडू या खेळात प्रावीण्य मिळवत आहेत. अशा खेळाडूंना प्रोत्साहन देण्यासाठी आणि त्यांचे कौशल्य सिद्ध करण्यासाठी आवश्यक व्यासपीठ उपलब्ध करून देणे गरजेचे आहे. या माध्यमातून खेळाडूंना अधिक चांगली कामगिरी करण्याची संधी मिळेल. विजयपूरच्या क्रीडा प्रतिभांनी राष्ट्रीय तसेच आंतरराष्ट्रीय स्तरावर चमकावे, अशी अपेक्षाही कारजोल यांनी व्यक्त केली.

भारतामध्ये वुशु क्रीडेला प्रोत्साहन देण्यासाठी विविध ठिकाणी अशा स्पर्धांचे आयोजन केले जात आहे. पंतप्रधान नरेंद्र मोदी यांनीही क्रीडा क्षेत्राला विशेष महत्त्व दिले असून, खेळाडूंशी साधलेला त्यांचा संवाद युवा खेळाडूंसाठी प्रेरणादायी ठरत आहे. त्यामुळे क्रीडा प्रतिभा विकसित करून देशाला क्रीडा क्षेत्रात पुढे नेण्याची मोठी जबाबदारी खेळाडूंवर आहे, असेही कारजोल यांनी नमूद केले.

कार्यक्रमाचे प्रमुख पाहुणे अंतर्गत सुरक्षा विभागाचे पोलीस अधिकारी शकील पिंजार म्हणाले, महिलांनी आत्मरक्षणासाठी कराटे, वुशु यांसारख्या क्रीडा प्रकारांमध्ये आवर्जून सहभाग घ्यावा. आत्मरक्षणाच्या या कला महिलांमध्ये आत्मविश्वास निर्माण करण्यासोबतच जीवनात सुरक्षिततेची भावना आणि नवी आशा निर्माण करतात.

यावेळी राजशेखर दैवाडी, आरती पाटील, अशोक डी. मोकाशी, रवी एस. कल्लूर, भरतराज देसाई, अनिलकुमार पुजारी, शंकर सानप्पा, श्रीदेवी डेंगी, विजयलक्ष्मी पाटील, मलकप्पा मोसळगी, बसवराज हचडद यांच्यासह विविध क्षेत्रांतील मान्यवर उपस्थित होते.