सोशल मीडियाच्या प्रेमातून तरुणीने घर सोडले ; पो.नि. संदीप काळे यांच्या पुढाकाराने सुखरूप सुटका

प्रतिष्ठा न्यूज 

संग्रामपूर प्रतिनिधी : सोशल मीडियाच्या माध्यमातून झालेल्या ओळखीचे रूपांतर प्रेमात झाल्याने २२ वर्षीय तरुणी तब्बल २०० किलोमीटरचाप्रवास करून संबंधित युवकाला भेटण्यासाठी सोनाळायेथे आली होती. मात्र प्रत्यक्ष परिस्थिती पाहिल्यानंतर तिला आपल्या निर्णयाची चूक लक्षात आली.

पोलिसांची तत्परता

या घटनेची माहिती मिळताच सोनाळा पोलीस स्टेशनच्या अधिकाऱ्यांनी तत्परता दाखवत तरुणीची सुरक्षितता सुनिश्चित केली. तिच्याशी सविस्तर संवाद साधून सोशल मीडियावरील आभासी नातेसंबंध, त्यातील धोके, तसेच अपरिचित व्यक्तींवर विश्वास ठेवण्याचे संभाव्य परिणाम याबाबत समुपदेशन करण्यात आले.

यानंतर सोनाळा पोलिसांनी तरुणीच्या आई-वडिलांशी दूरध्वनीद्वारे संपर्क साधून संपूर्ण घटनेची माहिती दिली. पालक सोनाळा येथे आल्यानंतर त्यांच्यासमोरही समुपदेशन करण्यात आले. आवश्यक कायदेशीर व प्रशासकीय कार्यवाही पूर्ण करून तरुणीला तिच्या पालकांच्या ताब्यात सुखरूप देण्यात आले.

पोलीस निरीक्षकांचे आवाहन

यावेळी सोनाळा पोलीस ठाण्याचे पोलीस निरीक्षक संदीप काळेयांनी तरुण-तरुणींना आवाहन केले की, 

सोशल मीडियावरील ओळख किंवा आभासी प्रेमाच्या आहारी जाऊन कोणताही महत्त्वाचा निर्णय घेऊ नये. संबंधित व्यक्तीची खातरजमा न करता भेटण्यासाठी एकट्याने प्रवास करणे धोकादायक ठरू शकते. स्वतःचे भविष्य, शिक्षण, आयुष्य यावर लक्ष केंद्रित करावे. कोणतीही संशयास्पद किंवा फसवणुकीची घटना घडल्यास तात्काळ जवळच्या पोलीस स्टेशनशी संपर्क साधावा.

सोनाळा पोलिसांच्या तत्परतेमुळे एक संभाव्य अनर्थ टळला असून, या घटनेतून युवक-युवतींसह पालकांनीही सोशल मीडियाचा वापर करताना अधिक सजग राहण्याची गरज अधोरेखित झाली आहे.

-पोलीस निरीक्षक संदीप काळे

पोलीस स्टेशन सोनाळा