चार्वाक विचारसरणी सत्याची कास धरणारी; प्रश्न विचारण्याचा वारसा जपला पाहिजे – कुमार केतकर ; चार्वाक कोण होते?’ या पुस्तकाचे प्रकाशन

प्रतिष्ठा न्यूज 

अहिल्यानगर प्रतिनिधी : महाराष्ट्र अंधश्रद्धा निर्मूलन समितीच्या (महा.अंनिस) विस्तारित राज्य कार्यकारिणी बैठकीदरम्यान ज्येष्ठ विज्ञान लेखक जगदीश काबरे लिखित ‘चार्वाक कोण होते?’ या पुस्तकाचे प्रकाशन ज्येष्ठ विचारवंत, माजी संपादक आणि माजी खासदार कुमार केतकर यांच्या हस्ते करण्यात आले. यावेळी बोलताना त्यांनी चार्वाक विचारसरणीचा वारसा जपण्याचे आवाहन केले.

कुमार केतकर म्हणाले की, अंधश्रद्धा निर्मूलनाचे कार्य केवळ गेल्या ४० वर्षांपासून सुरू आहे, अशी समजूत पूर्णपणे योग्य नाही. भारतीय समाजात वैदिक काळापासूनच चार्वाकांनी अंधश्रद्धा, कर्मकांड आणि अवैज्ञानिक विचारांविरुद्ध आवाज उठविला होता. त्यांनी प्रस्थापित धर्म, वेद आणि कर्मकांडांना थेट आव्हान दिले. पंचेंद्रियांद्वारे अनुभवता येणाऱ्या गोष्टींनाच त्यांनी प्रमाण मानले. त्यामुळे स्वर्ग, नरक, आत्मा, मोक्ष आणि परलोक यांसारख्या संकल्पनांवर आधारित सत्ताकेंद्रांना मोठा धक्का बसला होता.

चार्वाकांच्या विचारांचा प्रभाव वाढू नये म्हणून त्यांचा छळ करण्यात आला. त्यांच्या ग्रंथांचा नाश करण्यात आला, तर काही चार्वाक विचारवंतांना जिवंत जाळल्याच्या नोंदीही आढळतात. मात्र एवढ्या दडपशाहीनंतरही चार्वाक विचारसरणी नष्ट झाली नाही. कारण ती सत्य, तर्क आणि चिकित्सक विचारांवर आधारित होती. सत्य कधीच नष्ट होत नसते, असे त्यांनी नमूद केले.

आजही प्रस्थापित संस्कृतीची चिकित्सा करणाऱ्या आणि व्यवस्थेला प्रश्न विचारणाऱ्या व्यक्तींना राष्ट्रद्रोही किंवा देशद्रोही ठरविण्याचा प्रयत्न होत असल्याची खंत त्यांनी व्यक्त केली. कोणतीही सत्ता कितीही प्रबळ असली तरी समाजहितासाठी प्रश्न विचारण्याचे धैर्य सोडता कामा नये. सत्ताधाऱ्यांच्या चुका दाखवून देणे आणि योग्य उत्तरांसाठी त्यांच्यावर लोकशाही मार्गाने दबाव निर्माण करणे ही लोकशाहीची गरज असल्याचे ते म्हणाले.

अंधश्रद्धा निर्मूलन समिती ही अशा प्रकारचा सामाजिक दबाव निर्माण करणारी आणि वैज्ञानिक दृष्टिकोन रुजविणारी एक महत्त्वाची चळवळ असल्याचे सांगून त्यांनी कार्यकर्त्यांचे कौतुक केले. या चळवळीत काम करताना कार्यकर्त्यांनाही अनेक प्रश्नांना सामोरे जावे लागते. त्यांना तर्कशुद्ध आणि अभ्यासपूर्ण उत्तरे देण्यासाठी चार्वाक विचारसरणी आत्मसात करणे आवश्यक असल्याचे त्यांनी स्पष्ट केले.

ही विस्तारित राज्य कार्यकारिणी बैठक ५ ते ७ जूनदरम्यान अहिल्यानगर येथे उत्साहात पार पडली.