सांगली विभाग नियंत्रक सुनील भोकरे यांच्या गैरकारभाराची चौकशी करण्याची मागणी

प्रतिष्ठा न्यूज

सांगली प्रतिनिधी : महाराष्ट्र राज्य मार्ग परिवहन महामंडळाच्या (एस.टी.) सांगली विभागाचे विभाग नियंत्रक सुनील भोकरे यांच्या कथित गैरकारभाराची सखोल चौकशी करून त्यांच्यावर कठोर कारवाई करावी, अशी मागणी सेवा शक्ती संघर्ष एस.टी. कर्मचारी संघ, महाराष्ट्र राज्य यांच्याकडून महामंडळाच्या उपाध्यक्ष व व्यवस्थापकीय संचालकांकडे करण्यात आली आहे.

संघटनेचे सचिव सतीश मेटकरी यांनी दिलेल्या निवेदनात विभाग नियंत्रक सुनील भोकरे यांनी पदभार स्वीकारल्यापासून विविध प्रकारचे आर्थिक गैरव्यवहार आणि नियमबाह्य निर्णय घेतल्याचा आरोप केला आहे. याबाबत प्रसारमाध्यमांमध्येही अनेक वृत्ते प्रसिद्ध झाल्याचे निवेदनात नमूद करण्यात आले आहे.

निवेदनानुसार, स्थानिक स्तरावर होऊ शकणाऱ्या खरेदीसाठी पुणे येथून खरेदी करण्यात आल्याने महामंडळाचे आर्थिक नुकसान झाले. तसेच आवश्यक समितीची मान्यता नसताना खरेदी प्रक्रिया राबविल्याचा आरोप करण्यात आला आहे.

याशिवाय, महापालिकेची आवश्यक परवानगी नसताना चालक प्रशिक्षण हॉल बांधण्यात आल्याचा आरोप करण्यात आला आहे. त्यामुळे संबंधित हॉलचा वापर करता आला नसून महामंडळाच्या लाखो रुपयांचा निधी वाया गेल्याचे संघटनेचे म्हणणे आहे.

बदली आदेशांमध्ये आर्थिक व्यवहार झाल्याचाही गंभीर आरोप निवेदनात करण्यात आला आहे. सुरुवातीला कर्मचाऱ्यांची बदली करून नंतर आर्थिक लाभ घेऊन काही आदेश रद्द करण्यात आल्याचा दावा संघटनेने केला आहे.

तसेच पुणे येथील एस.टी. महामंडळाच्या निवासस्थानाबाबत चुकीची माहिती देऊन स्वतःच्या किंवा नातेवाईकांच्या नावाने सुविधा घेतल्याचा आरोपही करण्यात आला आहे. या प्रकरणाची स्वतंत्र चौकशी करून संबंधितांकडून नुकसानभरपाई वसूल करावी, अशी मागणी करण्यात आली आहे.

सेवा शक्ती संघर्ष एस.टी. कर्मचारी संघाने विभाग नियंत्रक सुनील भोकरे यांच्या कार्यकाळातील सर्व बांधकामे, खरेदी प्रक्रिया व प्रशासकीय निर्णयांची उच्चस्तरीय चौकशी करून दोषी आढळल्यास त्यांच्यावर शिस्तभंगाची कारवाई करावी, अशी मागणी महामंडळ प्रशासनाकडे केली आहे.

दरम्यान, या सर्व आरोपांची सत्यता चौकशीनंतरच स्पष्ट होणार असून, संबंधित प्रशासनाकडून याबाबत कोणती भूमिका घेतली जाते याकडे एस.टी. कर्मचारी आणि प्रवाशांचे लक्ष लागले आहे.