शैलेश कदम यांनी जिंकले जागतिक योगासन स्पर्धेत सुवर्णपदक; सांगलीच्या शिरपेचात मानाचा तुरा

प्रतिष्ठा न्यूज / योगेश रोकडे

सांगली : अहमदाबाद येथे ४ ते ८ जूनदरम्यान प्रथमच आयोजित करण्यात आलेल्या जागतिक योगासन २०२६ स्पर्धेत सांगली जिल्हा योगासन स्पोर्ट्स असोसिएशनचे टेक्निकल सचिव, योग शिक्षक आणि आंतरराष्ट्रीय योगपटू शैलेश शंकर कदम यांनी उत्कृष्ट कामगिरी करत सुवर्णपदक पटकावले. जगातील सुमारे ७८ देशांतील खेळाडू सहभागी झालेल्या या स्पर्धेत त्यांनी भारताचा गौरव वाढविला.

शैलेश कदम यांनी ३५ ते ४५ वर्षे वयोगटातील सीनियर ‘बी’ गटातील बॅक बेंडिंग प्रकारात लवचिकता, संतुलन आणि कौशल्याचे उत्कृष्ट प्रदर्शन करत सुवर्णपदकावर आपले नाव कोरले. त्यांच्या या यशामुळे सांगली जिल्ह्याच्या शिरपेचात आणखी एक मानाचा तुरा खोवला गेला आहे.

गेल्या तब्बल २५ वर्षांपासून योगासन क्षेत्रात सातत्यपूर्ण सराव आणि कठोर परिश्रम करणाऱ्या शैलेश कदम यांच्या दीर्घ साधनेचे हे यशस्वी फळ मानले जात आहे. यापूर्वीही २००६ मध्ये मॉरिशस येथे झालेल्या आंतरराष्ट्रीय योगासन स्पर्धेत त्यांनी बॅक बेंडिंग प्रकारात सुवर्णपदक जिंकून देशाचे नाव उज्ज्वल केले होते.

या यशामागे पंतप्रधान नरेंद्र मोदी, योगासन भारतचे महासचिव जयदीप आर्य, एशियन योगासन व महाराष्ट्र योगासन स्पोर्ट्स असोसिएशनचे अध्यक्ष डॉ. संजय मालपाणी, तसेच योगासन भारतचे टेक्निकल डायरेक्टर सतीश मोहगावकर यांचे वेळोवेळी मिळालेले प्रोत्साहन, मार्गदर्शन आणि पाठबळ महत्त्वाचे ठरल्याची भावना व्यक्त करण्यात आली.

तसेच सांगली जिल्हा योगासन स्पोर्ट्स असोसिएशनचे अध्यक्ष विवेक शेटे आणि उपाध्यक्षा प्रज्ञा खोत यांचेही त्यांना मोलाचे प्रोत्साहन लाभले.

शैलेश कदम यांच्या या उल्लेखनीय कामगिरीबद्दल क्रीडा, योगासन आणि सामाजिक क्षेत्रातील मान्यवरांकडून अभिनंदनाचा वर्षाव होत असून, त्यांच्या यशामुळे सांगली जिल्ह्यासह राज्यातील युवा आणि वरिष्ठ खेळाडूंना प्रेरणा मिळणार आहे. योगासन क्षेत्राच्या विकासाला या यशामुळे नवी उभारी मिळेल, असा विश्वास व्यक्त केला जात आहे.