“तासगाव नगरपरिषदेत बदलले चित्र; गोंधळाऐवजी विकासावर तब्बल पावणे दोन तास चर्चा!”

प्रतिष्ठा न्यूज/किरण कुंभार 

तासगाव:अवघ्या दोन मिनिटांत सभा आटोपणे, सत्ताधाऱ्यांकडून बहुमताच्या जोरावर ठराव मंजूर करणे, त्यातून विरोधकांकडून घोषणाबाजी, टेबल वाजवणे, सभागृहाला आतून कडी लावून रोखून धरणे,शाब्दिक वादावादी आणि तणावाचे वातावरण… तासगाव नगरपरिषदेच्या सभागृहात आजपर्यंत हेच चित्र पाहायला मिळत होते.मात्र सोमवारी झालेल्या सर्वसाधारण सभेने या परंपरेलाच छेद दिला.तब्बल पावणे दोन तास चाललेल्या या सभेत प्रत्येक विषयावर सखोल चर्चा झाली.विशेष म्हणजे,खेळीमेळीच्या वातावरणात पार पडलेल्या या सभेनंतर विरोधी गटातील नगरसेवकांनीच नगराध्यक्षा,उपनगराध्यक्ष आणि सत्ताधारी गटाचे अभिनंदन करत आभार मानले.त्यामुळे तासगावच्या राजकीय वर्तुळात या सभेची जोरदार चर्चा सुरू झाली आहे. नगरपरिषदेच्या स्थापनेपासून आतापर्यंत झालेल्या चारही सभा अत्यंत कमी वेळात संपवण्यात आल्या होत्या.सत्ताधाऱ्यांनी बहुमताच्या आधारे विषय मंजूर केल्याचा आरोप विरोधकांनी सातत्याने केला होता.त्यातून अनेकदा सभागृहात गदारोळ निर्माण झाला होता.निषेधाच्या घोषणा, टेबल वाजवणे,अपशब्दांचा वापर तसेच सभागृहाला आतून कडी लावून सभा रोखण्याचे प्रकारही घडले होते. त्यामुळे नगरपरिषदेच्या सभागृहात कायम तणावाचे वातावरण निर्माण होत होते.

मात्र सोमवारी झालेल्या सभेपूर्वीच नगराध्यक्षा सौ.विजया बाबासो पाटील यांनी स्पष्ट भूमिका घेत सभागृहाला शिस्तीचा इशारा दिला. “सभा व्यवस्थित चालवायची आहे. प्रत्येक विषयावर सविस्तर चर्चा व्हावी.मात्र विषयाला धरूनच चर्चा झाली पाहिजे.कोणी अपशब्द वापरले, टेबल वाजवले किंवा गैरवर्तन केले,तर त्याची नोंद सभागृहात केली जाईल,” असे त्यांनी ठामपणे सांगितले.त्यानंतर नगराध्यक्षा सौ.विजया पाटील यांच्या अध्यक्षतेखाली झालेल्या या सभेला उपनगराध्यक्ष प्रसाद पैलवान,मुख्याधिकारी सुधाकर लेंडवे तसेच सर्व नगरसेवक उपस्थित होते.विषयपत्रिकेवरील एकूण १८ विषयांवर सविस्तर चर्चा करण्यात आली.त्यापैकी १७ विषय सर्वानुमते मंजूर झाले,तर एका विषयाला बहुमताने मंजुरी देण्यात आली.सभेदरम्यान विरोधकांनी मांडलेल्या सूचनांची दखल नगराध्यक्षांकडून तातडीने घेतली जात होती. त्यामुळे विरोधी सदस्यांनाही सभागृहात आपले मत मांडण्याची संधी मिळाली.अनेक विषयांवर सत्ताधारी आणि विरोधकांनी एकत्रितपणे सूचना मांडत विकासकामांवर भर दिला.सभेच्या शेवटी नगरसेवक अॅड. तुकाराम कुंभार यांनी सभा चर्चेने आणि सौहार्दपूर्ण वातावरणात पार पडल्याबद्दल नगराध्यक्षा, उपनगराध्यक्ष आणि सर्व नगरसेवकांचे अभिनंदन करून आभार मानले. यावेळी विरोधी गटातील सदस्यांनी नगराध्यक्षा विजया पाटील आणि उपनगराध्यक्ष प्रसाद पैलवान यांना पुष्पगुच्छ देऊन सत्कार केला.नगराध्यक्षा सौ.विजया पाटील यांनी सभेचे कामकाज शांततेत आणि विकासाभिमुख पद्धतीने पार पडण्यासाठी सहकार्य करणाऱ्या सर्व सदस्यांचे आभार मानले.तासगाव नगरपरिषदेच्या इतिहासात प्रथमच इतक्या शांत, सुसंवादात्मक आणि विकासकेंद्री पद्धतीने सभा पार पडल्याने नागरिकांमधूनही समाधान व्यक्त होत आहे.