प्रतिष्ठा न्यूज/योगेश रोकडे
मुंबई: महाराष्ट्र राज्य मार्ग परिवहन महामंडळाने (एसटी) सेवानिवृत्त अधिकारी व कर्मचाऱ्यांसाठी महत्त्वाचा आणि दिलासादायक निर्णय घेतला आहे. सेवानिवृत्त कर्मचाऱ्यांना आणि त्यांच्या पत्नी/पतींना मिळणाऱ्या मोफत प्रवास सवलतीची व्यवस्था आता अधिक सुसंगत, पारदर्शक आणि तंत्रज्ञानाधारित करण्याचा निर्णय घेण्यात आला आहे.
परिवहन मंत्री तथा एसटी महामंडळाचे अध्यक्ष प्रताप सरनाईक यांच्या निर्देशानुसार हा निर्णय घेण्यात आला असून, मोफत प्रवास पास योजनेसोबत डिजिटल NCMC (National Common Mobility Card) प्रणालीची जोड देण्यात येणार आहे.
या निर्णयानुसार, सेवेतून निवृत्त झालेले तसेच अपघातग्रस्त किंवा निधन झालेल्या कर्मचाऱ्यांच्या पत्नी/पतींनाही एप्रिल २०२६ पासून पूर्ण वर्षभर मोफत प्रवासाची सुविधा उपलब्ध होणार आहे. या सवलतीचा लाभ घेताना लाभार्थींना केवळ नाममात्र शुल्क भरून एसटीच्या विविध प्रकारच्या बसेसमधून प्रवास करता येणार आहे.
महामंडळाने यासंदर्भातील अटी व निकष अधिक स्पष्ट करून, कुटुंबीय प्रवास सवलतीचा लाभ अधिक सुलभ करण्याचा प्रयत्न केला आहे. पारंपरिक पास व्यवस्थेला आधुनिकतेची जोड देत ‘RuPay On-The-Go’ सक्षम NCMC कार्ड प्रणालीचा अवलंब करण्यात येणार आहे. त्यामुळे भविष्यात मोफत प्रवास पासधारकांसाठी डिजिटल ओळख आणि व्यवहार प्रक्रिया अधिक सुलभ होणार आहे.
राज्यातील आगारांमध्ये अधिकृत एजंटमार्फत या कार्डांची नोंदणी व वितरण प्रक्रिया राबविण्यात येणार असून, NSDL पेमेंट बँकेच्या माध्यमातून ही यंत्रणा कार्यान्वित केली जाणार आहे.
महत्त्वाचे म्हणजे, आगामी काळात या सवलतीचा लाभ घेण्यासाठी NCMC कार्ड बंधनकारक करण्याचा प्रस्तावही पुढे आला आहे. त्यामुळे लाभार्थींनी वेळेत नोंदणी करून डिजिटल प्रणालीचा स्वीकार करणे आवश्यक ठरणार आहे.
या निर्णयामुळे एकीकडे सेवानिवृत्त एसटी कर्मचाऱ्यांना सामाजिक बांधिलकी जपत दिलासा मिळणार असून, दुसरीकडे सार्वजनिक वाहतूक व्यवस्थेत डिजिटल व्यवहार प्रणालीचा प्रसार होण्यासही चालना मिळणार आहे. कर्मचाऱ्यांच्या हिताचे रक्षण करत काळानुरूप बदल स्वीकारण्याची एसटी महामंडळाची भूमिका या निर्णयातून अधोरेखित झाली आहे.
टिप्पणी पोस्ट करा
0टिप्पण्या