प्रतिष्ठा न्यूज
हुपरी (जिल्हा कोल्हापूर) - हुपरी पंचक्रोशी, पंचतारांकीत औद्योगिक वसाहत आणि या परिसरात गेल्या काही काळात गांजा, इतर अमली पदार्थांचे प्रमाण चिंताजनकरीत्या वाढत असल्याचे निदर्शनास येत आहे. विशेषतः युवक वर्ग मोठ्या प्रमाणात या व्यसनाधीनतेच्या विळख्यात अडकत असून यामुळे त्यांच्या आरोग्यावर, शिक्षणावर तसेच समाजाच्या नैतिक आणि सामाजिक स्वास्थ्यावर गंभीर परिणाम होत आहेत. गांजा आणि ड्रग्ज यांची अवैध विक्री अन् वितरण करणार्या टोळ्या सक्रिय असून यामुळे परिसरातील तरुण पिढीचे भवितव्य धोक्यात येत आहे. यामुळे गुन्हेगारीचे प्रमाण वाढत असल्याने समाजासाठी ते अत्यंत घातक आहे. तरी हुपरी आणि परिसरात वाढत चाललेल्या गांजा व ड्रग्जच्या विक्री-प्रसाराविरोधात, तसेच त्यांना पाठिशी घालणार्यांच्या कठोर कारवाई करावी, या मागे जिहादी षडयंत्र असल्यास त्याचा शोध घ्यावा, या मागणीसाठी नेताजी सुभाषचंद्र चौक येथे हिंदु राष्ट्र-जागृती आंदोलन करण्यात आले.या विषयाच्या संदर्भात गतवेळी ज्यांनी मोर्चा काढला होता, आंदोलन केले होते त्यांच्यावरच पोलीस प्रशासनाने गुन्हे नोंद केले असून ते गुन्हे तात्काळ मागे घ्यावेत, अशीही एकमुखी मागणी या वेळी करण्यात आली. आंदोलन झाल्यावर हुपरी पोलीस ठाण्याचे पोलीस निरीक्षक एन्.आर्. चौखंडे यांनी आंदोलनस्थळी येऊन निवेदन स्वीकारले.
या प्रसंगी विश्व हिंदु परिषदचे जिल्हासहमंत्री श्री. निळंकठ माने, वस्ताद श्री. नेताजी निकम, ज्येष्ठ नागरीक संघाचे अध्यक्ष श्री. सुरेश इंग्रोळे आणि उपाध्यक्ष श्री. नानासाहेब भोसले, अखिल भारतीय हिंदू महासभेचे उपाध्यक्ष श्री. रमेश भोरे, माजी सरपंच आप्पासाहेब देसाई, विश्व हिंदु परिषदेचे श्री. गौरव नेमिष्टे, हिंदु राष्ट्र समन्वय समितीचे श्री. नितीन काकडे, हिंदु जनजागृती समितीचे श्री. आदित्य शास्त्री आणि श्री. शिवानंद स्वामी यांनी त्यांचे मनोगत व्यक्त केले. आंदोलनप्रसंगी विश्व हिंदु परिषद-बजरंग दलाचे श्री. श्रावण मुधाळे, अखिल भारतीय हिंदू महासभेचे शहरप्रमुख श्री. संजय पाटील, मंदिर महासंघाचे श्री. अशोक गुरव, हिंदुत्वनिष्ठ सर्वश्री विक्रम सावंत, निखिल कांबळे यासंह मोठ्या संख्येने हिंदुत्वनिष्ठ उपस्थित होते.
या वेळी करण्यात आलेल्या काही मागण्या
१. हुपरी व परिसरातील गांजा आणि ड्रग्ज विक्रेत्यांवर NDPS (Narcotic Drugs and Psychotropic Substances Act, 1985) कायद्याच्या कलम ८ (विक्रीसाठी तयारी किंवा विक्री) आणि कलम २० (वाहतूक) अंतर्गत तात्काळ कठोर कारवाई करावी. त्यांना पाठिंबा देणार्यांवर कलम २९ (सहभाग किंवा षडयंत्र) अंतर्गत गुन्हे दाखल करावेत; तसेच या गुन्हेगारांना जे पाठिशी घालत आहे त्यांच्यावर कठोर कारवाई करण्यात यावी.
२. अमली पदार्थांच्या पुरवठा साखळी उघडण्यासाठी NDPS कायद्याच्या कलम २७ (साखळीशी संबंधित गुन्हे) अंतर्गत विशेष मोहीम राबवावी आणि ती पूर्णपणे नष्ट करावी.
३.अमली पदार्थांच्या पुरवठ्याच्या साखळीचा शोध घेऊन ती पूर्णपणे नष्ट करण्यासाठी विशेष मोहिम राबविण्यात यावी.
टिप्पणी पोस्ट करा
0टिप्पण्या