तुळशीराम हरिजन यांची गुंडा कायद्यांतर्गत स्थानबद्धता आणखी एक वर्ष कायम ; कर्नाटक सरकारचा आदेश

प्रतिष्ठा न्यूज / दिपक शिंत्रे

विजयपूर : विजयपूरचे जिल्हाधिकारी तथा जिल्हा दंडाधिकारी यांनी गुंडा कायद्यांतर्गत स्थानबद्ध केलेल्या तुळशीराम बिन पंडित हरिजन ऊर्फ बनसोड यांची स्थानबद्धता आणखी एका वर्षासाठी कायम ठेवण्याचा आदेश कर्नाटक सरकारने दिला आहे.

  कर्नाटक कच्ची दारू, व्यापारी, अमली पदार्थ अपराधी, जुगारी, गुंड, अनैतिक व्यवसाय करणारे अपराधी, झोपडपट्टी बळकावणारे तसेच व्हिडिओ किंवा ऑडिओ पायरेट्स यांच्या प्रतिबंधक कायदा, 1985 अंतर्गत जिल्हाधिकारी यांनी 10 जुलै 2026 रोजी स्थानबद्धतेचा आदेश जारी केला होता. या आदेशाला सरकारने 20 जुलै 2026 रोजी मंजुरी दिली होती.

  स्थानबद्धतेच्या प्रकरणाची तपासणी करणाऱ्या सल्लागार मंडळाने 19 ऑगस्ट 2026 रोजी तुळशीराम यांना स्थानबद्ध ठेवण्यासाठी पुरेशी कारणे असल्याचे मत नोंदवले.

  सरकारकडे सादर करण्यात आलेल्या प्रस्तावानुसार, तुळशीराम हा विजयपूर शहर, इंडी, सिंदगी तसेच विजयपूर ग्रामीण पोलीस ठाण्यांच्या हद्दीत आणि कलबुर्गी जिल्ह्यात विविध गंभीर गुन्ह्यांमध्ये सहभागी असल्याचा आरोप आहे. तो 2017 पासून गुन्हेगारी कारवायांमध्ये सक्रिय असल्याचे नमूद करण्यात आले आहे. त्यानंतर त्याने स्वतःची “TH” (तुळशीराम हरिजन) टोळी तयार करून गुन्हेगारी कारवाया सुरू ठेवल्याचे प्रस्तावात म्हटले आहे.

   खून, खुनाचा प्रयत्न, बेकायदेशीर शस्त्रांचा वापर, दरोडा तसेच सरकारी कर्तव्यात अडथळा आणणे यांसारख्या गंभीर गुन्ह्यांमध्ये त्याचा सहभाग असल्याचे सरकारच्या आदेशात नमूद करण्यात आले आहे.

 यापूर्वी त्याच्याविरुद्ध गुन्हे दाखल होऊन अटक, न्यायालयीन कारवाई, प्रतिबंधात्मक कारवाई तसेच रौडी शीटची नोंद व देखरेख करण्यात आली होती. तरीही त्याच्या वर्तनात कोणताही बदल झाला नसल्याचे जिल्हाधिकाऱ्यांच्या प्रस्तावात नमूद आहे. त्याच्या कारवायांमुळे नागरिकांमध्ये भीती व असुरक्षिततेची भावना निर्माण होत असून, सामान्य कायद्याच्या माध्यमातून त्याच्या गुंडगिरीवर नियंत्रण ठेवणे पुरेसे नसल्याचे सरकारने नमूद केले आहे.

त्यामुळे गुंडा कायद्यांतर्गत 10 जुलै 2026 पासून एक वर्षाच्या कालावधीसाठी तुळशीराम हरिजन यांची स्थानबद्धता पुढे कायम ठेवण्याचा आदेश कर्नाटक सरकारने दिला आहे.