असळजच्या प्रस्तावित रस्त्याला विरोध ; जुना मार्गच कायम ठेवण्याची मागणी; नवीन मार्ग पूरस्थितीस कारणीभूत

प्रतिष्ठा न्यूज /तुकाराम पडवळ 

गगनबावडा : कोल्हापूर-गगनबावडा राष्ट्रीय महामार्गाच्या प्रस्तावित रुंदीकरणाला असळज येथील स्थानिक शेतकरी व व्यापाऱ्यांनी तीव्र विरोध केला आहे. प्रस्तावित बाजारपेठेच्या मागील बाजूने जाणारा रस्ता रद्द करावा आणि पूर्वीप्रमाणेच बाजारपेठेतून जाणाऱ्या जुन्या मार्गाचे रुंदीकरण करावे, अन्यथा तीव्र आंदोलन करण्याचा इशारा देण्यात आला आहे. बुधवारी असळज येथे आयोजित करण्यात आलेल्या ग्रामस्थांच्या विशेष बैठकीत हा महत्त्वपूर्ण निर्णय घेण्यात आला.

पूरस्थितीची गंभीर भीती:

गगनबावडा तालुक्यात कोल्हापूर ते तळेरे या मार्गावरील कळे ते सांगशी या दुसऱ्या टप्प्याचे काम प्रस्तावित आहे. सध्या पळसंबे फाटा ते पद्मश्री डॉ. डी. वाय. पाटील सहकारी साखर कारखान्यापर्यंतचा रस्ता असळज बाजारपेठेतूनच जात आहे. मात्र, नव्याने करण्यात आलेल्या सर्वेक्षणानुसार हा रस्ता बाजारपेठेच्या पूर्वेकडील म्हणजेच मागील बाजूने प्रस्तावित करण्यात आला आहे. जर रस्ता बाजारपेठेच्या मागून गेला, तर तिथे अत्यंत उंच पूल बांधावा लागेल आणि मोठा मातीचा भराव टाकावा लागेल. यामुळे पावसाळ्यात या भागात अत्यंत गंभीर पूरस्थिती निर्माण होण्याची भीती ग्रामस्थांनी व्यक्त केली आहे.

याच ठिकाणी कुंभी आणि रुपणी या दोन नद्यांचा संगम होतो. वेसरफ लघु प्रकल्पातील पाणी आणि कुंभी प्रकल्पातून होणाऱ्या पाण्याच्या विसर्गामुळे पूर आल्यास पळसंबे, नाळेवाडी, चाफेवाडी, रुपणीवाडी, निगडेवाडी व असळज बाजारपेठ या संपूर्ण परिसरात पाणी शिरणार आहे. यामुळे संपूर्ण बाजारपेठ पाण्याखाली जाऊन स्थानिक व्यापारी, शेतकरी आणि सर्वसामान्य नागरिकांचे मोठे आर्थिक नुकसान होईल, अशी भीती बैठकीत व्यक्त करण्यात आली.

उग्र आंदोलनाचा इशारा:

याबाबत यापूर्वीच ग्रामस्थ व व्यापाऱ्यांनी आमदार सतेज पाटील यांच्यासोबत बैठक घेतली होती. या बैठकीत प्रस्तावित नवीन मार्ग रद्द करून जुन्या मार्गाचेच रुंदीकरण करण्याची मागणी राष्ट्रीय महामार्ग विभागाकडे करण्यात आली आहे. जर ही रास्त मागणी मान्य झाली नाही, तर आगामी काळात तीव्र स्वरूपाचे उग्र आंदोलन करण्याचा निर्धार असळज येथील बैठकीत ग्रामस्थांनी एकमुखाने व्यक्त केला.

बैठकीतील उपस्थिती :

या महत्त्वपूर्ण बैठकीस डी. वाय. पाटील कारखान्याचे संचालक मानसिंग पाटील व दत्तात्रय पाटणकर यांच्यासह बाळकृष्ण गावकर, योगेश गावकर, तुकाराम भालेकर, नारायण गावकर, संतोष दाभोलकर, सचिन सातपुते, प्रकाश मोहिते, दिलीप गावकर, सागर गावकर, लहू बांडागळे, विठोबा चौकेकर, नाना गावकर, उत्तम नागप, रविंद्रनाथ भालेकर, संदीप पाटील, राजेश शिंदे, दिग्विजय डावरे, संतोष पाटील आणि मोठ्या संख्येने स्थानिक शेतकरी व व्यापारी उपस्थित होते.