स्त्री-पुरुष दोन्ही आवाजांची जादू; उमा तासगावकरांना ‘जीवन गौरव 2026’ पुरस्कार

प्रतिष्ठा न्यूज/किरण कुंभार 

तासगाव:तासगावच्या सांस्कृतिक क्षेत्रासाठी अभिमानाची बाब ठरलेल्या एका विशेष सोहळ्यात प्रसिद्ध गायिका व नृत्यांगना उमा माणिक मोहिते उर्फ उमा तासगावकर यांना “जीवन गौरव 2026 उत्कृष्ट गायिका पुरस्कार” देऊन सन्मानित करण्यात आले. पश्चिम महाराष्ट्र कलाकार संघटना, इचलकरंजी यांच्या वतीने शुक्रवार दि. २२ मे रोजी इचलकरंजी येथे हा भव्य पुरस्कार वितरण सोहळा पार पडला.या कार्यक्रमाला माजी पाणीपुरवठा सभापती अब्राहम आवळे,नगरसेविका सौ.क्रांती आवळे,पश्चिम महाराष्ट्र कलाकार संघटनेचे अध्यक्ष राजू शेख,महिला अध्यक्षा सौ.ऋचा कदम यांच्यासह अनेक मान्यवर उपस्थित होते. मान्यवरांच्या हस्ते उमा तासगावकर यांचा सन्मान करण्यात आला.उमा तासगावकर यांनी आपल्या अनोख्या गायकीच्या शैलीमुळे आणि नृत्यकलेमुळे संपूर्ण पश्चिम महाराष्ट्रात स्वतंत्र ओळख निर्माण केली आहे.हिंदी-मराठी चित्रपटगीते, भक्तिगीते, गवळणी तसेच स्त्री आणि पुरुष अशा दोन्ही आवाजांमध्ये प्रभावी गायन करण्याची त्यांची खासियत रसिकांना भुरळ घालणारी ठरली आहे.तमाशा आणि लोककलेच्या परंपरेतून आलेल्या उमा यांनी आपल्या कलेच्या जोरावर रसिकांच्या मनावर अधिराज्य गाजवले आहे.“माझ्या रक्ताच्या थेंबाथेंबात कला आहे.त्यामुळे अभिनय,नृत्य आणि गायन हे मला सहज साकारता येते,” असे भावनिक उद्गार उमा तासगावकर यांनी पुरस्कार स्वीकारताना काढले.त्यांच्या कलेचा वारसा त्यांना घरातूनच लाभला आहे.आजोबा कै.गुलाबराव तासगावकर,वडील कै.माणिक, चुलते विश्वास तसेच आजोळ बस्तवडे येथील आजोबा कै.शामराव पाचेगावकर,आजी कै. हिराबाई, मामा जयसिंग, मावशी सौ. लंका आणि विशेषतः नृत्यांगना आई लता पाचेगावकर यांच्या कलावैभवाचा प्रभाव उमा यांच्या बालपणापासूनच त्यांच्या जडणघडणीत दिसून आला.

वाघ्या-मुरळी, बेंड-बेंजो आणि लता लंका पाचेगावकर लोकनाट्य तमाशा या माध्यमातून त्यांना गायन व नृत्य सादर करण्याची संधी मिळाली. स्त्री आणि पुरुष या दोन्ही आवाजांतून गायन करण्याच्या त्यांच्या वैशिष्ट्यपूर्ण शैलीची दखल घेत पश्चिम महाराष्ट्र कलाकार संघटनेने त्यांना उत्कृष्ट गायिका पुरस्काराने गौरविले.उमा तासगावकर यांनी आतापर्यंत ईश्वरपूर, मिरज, पुणे, बेले महोत्सव, माढा तसेच स्टार प्रवाह आणि महाराष्ट्र शासन आयोजित विविध कला महोत्सवांमध्ये उल्लेखनीय कामगिरी करत अनेक पारितोषिके पटकावली आहेत.पुरस्कारानंतर बोलताना त्यांनी सांगितले की, “या सन्मानामुळे माझ्यात नव्या उर्जेचा संचार झाला आहे. लोककला, तमाशा आणि पारंपरिक कार्यक्रमांना नवसंजीवनी देण्यासाठी पुढील काळात अधिक जोमाने काम करणार असून तमाशा रसिकांना आणि श्रोत्यांना नेहमी काहीतरी नाविन्यपूर्ण देण्याचा प्रयत्न राहील.”उमा तासगावकर यांच्या या यशामुळे तासगावच्या सांस्कृतिक विश्वात आनंदाचे वातावरण निर्माण झाले असून विविध स्तरांतून त्यांच्यावर अभिनंदनाचा वर्षाव होत आहे.