गगनबावड्याला ‘न्याय’ द्या! नंदकुमार पोवार यांना जिल्हा परिषद स्वीकृत सदस्य करा; तालुक्यातून एकमुखी एल्गार

प्रतिष्ठा न्यूज / तुकाराम पडवळ 

गगनबावडा :  गेल्या अनेक वर्षांपासून राजकीय उपेक्षेचे धनी ठरलेल्या गगनबावडा तालुक्याला आता जिल्ह्याच्या राजकारणात मानाचे स्थान मिळण्याची वेळ आली आहे. कोल्हापूर जिल्हा परिषदेच्या स्वीकृत सदस्यपदी भाजपचे जिल्हा उपाध्यक्ष आणि ज्येष्ठ नेते नंदकुमार पोवार यांची निवड करून तालुक्याला खऱ्या अर्थाने प्रतिनिधित्व द्यावे, अशी आग्रही मागणी भारतीय जनता पक्षाच्या कार्यकर्त्यांनी वरिष्ठ नेतृत्वाकडे केली आहे.

निष्ठावंताचा सन्मान : अन्यायाचे परिमार्जन करण्याची संधी

  गगनबावडा हा तसा डोंगराळ आणि दुर्गम तालुका, पण इथल्या कार्यकर्त्यांची निष्ठा मात्र अभेद्य आहे. आजवर या तालुक्यातून जिल्हा पातळीवर मोठ्या संधी नाकारल्या गेल्याची भावना कार्यकर्त्यांमध्ये आहे. "आता नाही तर कधीच नाही" अशा भूमिकेत असलेल्या तळागाळातील कार्यकर्त्यांनी नंदकुमार पोवार यांच्या नावाचा आग्रह धरला असून, त्यांच्या निवडीमुळे तालुक्यावर होणाऱ्या अन्यायाचे परिमार्जन होईल, असा सूर उमटत आहे.

का घडले पाहिजे नंदकुमार पोवार यांचे नेतृत्व?

  केवळ मागणी म्हणून नव्हे, तर पोवार यांच्याकडे असलेल्या प्रदीर्घ अनुभवाची शिदोरी त्यांच्या दाव्याला बळकटी देते:

राजकीय वारसा आणि अनुभव: स्व. खासदार बाळासाहेब माने यांच्या तालमीत तयार झालेले नेतृत्व. जिल्हा परिषदेतील शासकीय नोकरीचा त्याग करून त्यांनी समाजसेवेचे व्रत स्वीकारले.

प्रशासकीय पकड: बाळासाहेब माने यांचे स्वीय सहाय्यक म्हणून काम करताना त्यांना शासकीय कामकाजाचा दांडगा अनुभव मिळाला, ज्याचा फायदा तालुक्याला नक्कीच होईल.

संघटन कौशल्य: २००८ मध्ये जेव्हा तालुक्यात भाजपची स्थिती प्राथमिक होती, तेव्हा पोवार यांनी पक्ष विस्ताराचे आव्हान पेलले. आज प्रत्येक गावात भाजपचे जाळे विणण्यात त्यांचा मोलाचा वाटा आहे.

सरपंच ते जिल्हा उपाध्यक्ष: गगनबावडा नगरचे सरपंच म्हणून त्यांनी आपल्या कार्याची छाप पाडली असून, सध्या ते जिल्हा उपाध्यक्ष म्हणून बूथ स्तरापर्यंत संघटना मजबूत करत आहेत.

"नंदकुमार पोवार हे केवळ नेते नसून एक अभ्यासू, लढाऊ आणि प्रभावी वक्ते आहेत. प.पू. गगनगिरी महाराजांचे निस्सीम भक्त असलेल्या पोवार यांना संधी मिळाल्यास एका सामान्य कार्यकर्त्याचा सन्मान होईल आणि जनतेत सकारात्मक संदेश जाईल."

— तालुका पदाधिकारी व कार्यकर्ते, गगनबावडा

पक्षासमोर पेच की ऐतिहासिक निर्णय?

भाजपच्या वरिष्ठ नेतृत्वाकडे ही मागणी आता लावून धरण्यात आली आहे. आगामी निवडणुकांच्या पार्श्वभूमीवर गगनबावड्यासारख्या महत्त्वाच्या तालुक्याला झुकते माप देऊन नंदकुमार पोवार यांच्यासारख्या निष्ठावंताला संधी मिळणार का? याकडे संपूर्ण जिल्ह्याचे लक्ष लागले आहे.

आता चेंडू वरिष्ठ नेतृत्वाच्या कोर्टात असून, गगनबावड्याच्या 'न्यायाचा' निकाल काय लागतो, हे पाहणे औत्सुक्याचे ठरेल!