पोदार इंटरनॅशनल स्कूलमध्ये ८० वा स्वातंत्र्यदिन उत्साहात साजरा

प्रतिष्ठा न्यूज/ योगेश रोकडे 

सांगली : येथील पोदार इंटरनॅशनल स्कूलमध्ये भारताचा ८० वा स्वातंत्र्यदिन विविध देशभक्तीपर आणि सांस्कृतिक कार्यक्रमांनी मोठ्या उत्साहात साजरा करण्यात आला. कार्यक्रमास प्रमुख पाहुणे म्हणून सुभेदार श्री. अजित अडसूळ उपस्थित होते. त्यांच्या हस्ते ध्वजारोहण करण्यात आले.

इयत्ता अकरावीतील कु. इशिता पाटील व कु. अरिणी ससनुर यांनी कार्यक्रमाचे सूत्रसंचालन केले. कु. सानवी मोरे-पाटील हिने इंग्रजीत, तर कु. आदित्य रायनवार याने हिंदीत मनोगत व्यक्त केले. प्राथमिक व माध्यमिक विभागातील विद्यार्थ्यांनी विविध देशभक्तीपर गीतांचे सादरीकरण केले. इयत्ता तिसरीच्या विद्यार्थ्यांनी आकर्षक नृत्याविष्कार सादर केला, तर इयत्ता अकरावीच्या विद्यार्थ्यांनी देशभक्तीपर लघुनाटिका सादर करून उपस्थितांची मने जिंकली.

यावेळी शाळेतील क्रीडा व सांस्कृतिक स्पर्धांमध्ये उल्लेखनीय यश मिळवलेल्या विद्यार्थ्यांचा सत्कार करण्यात आला. तसेच विविध नामांकित संस्थांमध्ये उच्च शिक्षणासाठी निवड झालेल्या माजी विद्यार्थ्यांचाही सत्कार करून त्यांच्या पुढील वाटचालीस शुभेच्छा देण्यात आल्या. शाळेतील सर्व विद्यार्थ्यांनी ‘नशामुक्त भारत’ घडविण्याची शपथ घेतली.

प्रमुख पाहुणे सुभेदार श्री. अजित अडसूळ यांनी विद्यार्थ्यांना मार्गदर्शन करताना सांगितले की, आजच्या तरुणांनी विविध क्रांतिकारकांचा आदर्श घेऊन त्यांच्या कार्याची प्रेरणा घ्यावी आणि आपल्या कर्तृत्वातून देशाचे नाव जगभर उज्ज्वल करावे. यावेळी त्यांनी सियाचीनमधील आपल्या अनुभवांसह भारतीय सैनिकांना येणाऱ्या आव्हानांची व त्यांच्या त्यागाची माहिती विद्यार्थ्यांना दिली.

कु. रणवीर भोसले याने आभार प्रदर्शन केले. अध्यक्षीय भाषणाने कार्यक्रमाची सांगता झाली.

कार्यक्रमास शाळेचे प्राचार्य श्री. जी. बी. पाटील, शाळा प्रशासक श्री. बजरंग पाटील, सर्व शिक्षक, शिक्षकेतर कर्मचारी तसेच पालक मोठ्या संख्येने उपस्थित होते.