हरिपूर : न्यू एज्युकेशन सोसायटी संचलित श्रीमती कोंडाबाई कुंडलिक साळुंखे हायस्कूल, प्रा. सौ. तो. गो. कुलकर्णी बाल विद्यालय तसेच सौ. पार्वती किसन आळवेकर विद्यालय, हरिपूर येथे नव्या शैक्षणिक वर्षाच्या प्रारंभी प्रवेशोत्सव उत्साहपूर्ण वातावरणात साजरा करण्यात आला.
शाळेच्या पहिल्याच दिवशी विद्यार्थी, विद्यार्थिनी व पालकांचे औक्षण करून तसेच फुले उधळून त्यांचे जंगी स्वागत करण्यात आले. शाळेच्या परिसरासमोर आकर्षक रांगोळ्या रेखाटण्यात आल्या होत्या. फुग्यांच्या स्वागत कमानी उभारण्यात आल्या असून संपूर्ण परिसर उत्सवी वातावरणाने सजला होता.
नवागत विद्यार्थ्यांवर पुष्पवृष्टी करत वाद्यवृंदाच्या तालावर त्यांना शाळेत प्रवेश देण्यात आला. विद्यार्थ्यांच्या चेहऱ्यावरील आनंद आणि पालकांचा उत्साह यामुळे कार्यक्रमाला विशेष रंगत आली. शाळेच्या पहिल्या दिवसाचा हा संस्मरणीय अनुभव विद्यार्थ्यांसाठी प्रेरणादायी ठरला.
यावेळी न्यू एज्युकेशन सोसायटीचे संचालक राजेंद्र मेच प्रमुख उपस्थित होते. त्यांनी विद्यार्थ्यांना शुभेच्छा देत शिक्षणाच्या माध्यमातून उज्ज्वल भविष्य घडविण्याचा संदेश दिला.
प्रवेशोत्सवामुळे विद्यार्थी, पालक आणि शिक्षकांमध्ये आनंदाचे वातावरण निर्माण झाले असून नव्या शैक्षणिक वर्षाची उत्साहपूर्ण सुरुवात झाली.
टिप्पणी पोस्ट करा
0टिप्पण्या