तासगावात जनगणना प्रशिक्षण उत्साहात पहिल्यांदाच होणार डिजिटल जनगणना

प्रतिष्ठा न्यूज 

तासगाव प्रतिनिधी : कोविडमुळे 2021 ला होऊ न शकलेली जनगणना 2027 साली प्रस्तावित असून त्यासाठीची घरगणना यावर्षी होणार आहे. पूर्णपणे डिजिटल जनगणनेचे प्रगणक व पर्यवेक्षक यांच्यासाठी पहिल्या टप्प्याचे प्रशिक्षण पद्मभूषण डॉ. वसंतरावदादा पाटील महाविद्यालय तासगाव येथे उत्साहात पार पडले.

              तहसीलदार अतुल पाटोळे,नायब तहसीलदार प्रकाश बुरुंगळे यांच्या मार्गदर्शनाखाली तज्ञ मार्गदर्शक आण्णासाहेब गायकवाड,राहूल कोरे, प्रकाश पांढरे,संतोष वाघमोडे,राहुल गुरव यांनी मोबाईल ॲपद्वारे जनगणना कशी करावी,त्यासाठी आवश्यक नकाशा, प्रश्नावली कशी भरावी याबाबतीत तीन दिवस विस्तृतपणे प्रशिक्षण दिले.या प्रशिक्षणाचे प्रशासकीय कामकाज सौ. मनीषा कोळेकर या पहात आहेत.

               वेळोवेळीच्या निवडणूका व दशवार्षिक जनगणना हे शिक्षकांचे राष्ट्रीय कर्तव्य असून सदर प्रशिक्षणासाठी घरगणनेसाठी 9000 तर प्रत्यक्ष गणनेसाठी 16000 असे एकूण 25 हजार मानधन असून प्रशिक्षणासाठी दररोज 400 रुपये भत्ता शासनाकडून मिळणार असल्याचे महाराष्ट्र राज्य शिक्षक परिषद प्राथमिक विभागाचे सांगली जिल्हाध्यक्ष तथा पश्चिम महाराष्ट्र अध्यक्ष शशिकांत पाटील यांनी सांगितले.

             तज्ञ मार्गदर्शक आण्णासाहेब गायकवाड हे प्रशिक्षण देणाऱ्या टीमचे नेतृत्व करत असून त्यांनी मराठा आरक्षणाच्या वेळी अतिशय चांगले प्रकारचे कामकाज करत शिक्षकांचे मोबाईल ॲपद्वारे सर्वेचे कामकाज अतिशय चांगल्या प्रकारे सांभाळले होते. त्यांनी मराठा आरक्षणातील सर्व त्रुटींचे निवारण केलेले होते. त्यांच्या मार्गदर्शनाखाली तासगाव तालुक्यात जनगणनेचे कामकाज यशस्वीपणे पार पडेल असा विश्वास सांगली जिल्हा शिक्षक संघटना समन्वय समितीचे सहसरचिटणीस शशिकांत पाटील यांनी यावेळी व्यक्त केला. 

               तासगाव पंचायत समितीचे शिक्षण विस्तार अधिकारी शंकर पवार यांनी या प्रशिक्षणाला धावती भेट देऊन शिक्षकांच्या प्रश्नांचे निराकरण करून राष्ट्रीय भावनेने जनगणना करताना गणना कुटुंबाशी सौहार्दाचे वातावरण राखावे असे आवाहन केले.

               प्रशासन, प्रगणक, पर्यवेक्षक, तज्ञ मार्गदर्शक व शिक्षण प्रशासन यांच्याशी समान संपर्क राखत शिक्षकांना कोणतेही प्रकारची अडचण येऊ न देता जनगणना पार पाडण्यासाठी सर्वच घटक कार्यरत असल्याचे जिल्हाध्यक्ष शशिकांत पाटील यांनी सांगितले.

           पुढील तीन सत्रामध्ये होणाऱ्या प्रशिक्षणासाठी उन्हाची तीव्रता लक्षात घेता जिल्हाभर सकाळ सत्रात जनगणना प्रशिक्षण आयोजित करण्याबाबत प्रयत्नशील असल्याचे जिल्हाध्यक्ष शशिकांत पाटील यांनी सांगितले. प्रशिक्षणार्थ्यांच्या वतीने निलेश शेंडगे व सुनिता ठोंबरे यांनी मनोगत व्यक्त केले.जनगणना प्रतिज्ञेनंतर जिल्हाध्यक्ष शशिकांत पाटील यांनी आभार मानले.