सांगली : जिल्हा परिषद सांगलीचे मुख्य कार्यकारी अधिकारी श्री. विशाल नरवाडे यांनी धनुर्विद्या क्षेत्रात उल्लेखनीय कामगिरी करणारे शिक्षक रामलिंग विठ्ठल खाडे यांचा सहकुटुंब सत्कार करून अभिनंदन व शुभेच्छा दिल्या.
रामलिंग खाडे यांनी कोलकाता येथील SAI NS NIS या प्रतिष्ठित संस्थेतून धनुर्विद्या विषयातील प्रशिक्षण यशस्वीरित्या पूर्ण केले आहे. जिल्हा परिषदेतील शिक्षक म्हणून कार्यरत असताना त्यांनी धनुर्विद्या या क्रीडा क्षेत्रात केलेली ही उल्लेखनीय प्रगती जिल्ह्यासाठी अभिमानास्पद ठरली आहे.
या प्रसंगी श्री. नरवाडे यांनी खाडे यांच्या जिद्द, परिश्रम आणि क्रीडाप्रेमाचे कौतुक करत, “शिक्षकांनी अशा प्रकारे विद्यार्थ्यांसाठी आदर्श निर्माण करणे अत्यंत महत्त्वाचे आहे,” असे मत व्यक्त केले. खाडे यांच्या यशामुळे जिल्ह्यातील विद्यार्थ्यांमध्ये क्रीडा क्षेत्राबाबत प्रेरणा निर्माण होणार असल्याचेही त्यांनी नमूद केले. महाराष्ट्रातील जिल्हा परिषद शिक्षण विभागातील धनुर्विद्येचे प्रशिक्षक म्हणून ते महाराष्ट्रातून एकमेव शिक्षक ठरले आहेत.
सदर भेटीत खाडे यांचे कुटुंबीयही उपस्थित होते. कुटुंबासह झालेला हा सन्मान सोहळा अधिक आनंददायी ठरला.
रामलिंग खाडे यांच्या या यशामुळे जिल्हा परिषद सांगलीच्या शिरपेचात आणखी एक मानाचा तुरा रोवला गेला असून, भविष्यातही ते विद्यार्थ्यांना धनुर्विद्या क्षेत्रात मार्गदर्शन करून नवे खेळाडू घडवतील, अशी अपेक्षा व्यक्त होत आहे. त्यांच्या या यशामध्ये शिक्षणाधिकारी श्री मोहन गायकवाड, व इतर मान्यवरांचे योगदान लाभले. ते कार्यरत असणाऱ्या शाळेचे जिल्हा परिषद प्राथमिक डिजिटल सेमी इंग्रजी शाळा, हणमंतनगर (चिंचणी) चे योगदान अमूल्य आहे, तसेच सरपंच, शाळा समितीचे अध्यक्ष व उपाध्यक्ष पालक व विद्यार्थी यांच्या सहकार्याने त्यांचे प्रशिक्षण पूर्ण झाले.
टिप्पणी पोस्ट करा
0टिप्पण्या