राज्यात पावसाचा जोर वाढण्याची शक्यता; ३ ते ८ ऑगस्ट दरम्यान मुसळधार पावसाचा अंदाज

प्रतिष्ठा न्यूज/योगेश रोकडे 

मुंबई : बंगालच्या उपसागरात निर्माण झालेला कमी दाबाचा पट्टा तसेच बाष्पयुक्त वाऱ्यांच्या प्रभावामुळे राज्यातील पावसाचा जोर वाढण्याची शक्यता आहे. ३१ जुलै रोजी उत्तर महाराष्ट्र, खानदेश, मराठवाडा आणि पश्चिम महाराष्ट्रातील काही भागांत मुसळधार पावसाची शक्यता असून, ३ ऑगस्टपासून राज्यात पावसाचा पुन्हा जोर वाढण्याचा अंदाज हवामान अभ्यासकांनी व्यक्त केला आहे.

धुळे, नंदुरबार, शहादा, जळगाव आणि नाशिक जिल्ह्यांतील काही भागांत ३१ जुलै रोजी मुसळधार, तर काही ठिकाणी अतिवृष्टीसदृश पाऊस होण्याची शक्यता आहे. छत्रपती संभाजीनगर जिल्ह्यातील कन्नड, सिल्लोड, सोयगाव व वैजापूर, जालना जिल्ह्यातील भोकरदन व जाफराबाद तसेच बुलढाणा जिल्ह्यातही पावसाचा जोर वाढण्याची शक्यता आहे.

पश्चिम महाराष्ट्रातील पुणे, इंदापूर, सांगली आणि सोलापूर जिल्ह्यांतील काही भागांतही पावसाची हजेरी राहण्याचा अंदाज आहे. दरम्यान, १ आणि २ ऑगस्ट रोजी काही भागांत ढगाळ वातावरण, वाऱ्याचा वेग आणि हलका पाऊस राहण्याची शक्यता असून, मराठवाड्यातील लातूर, नांदेड, जालना आदी भागांत दुपारनंतर काहीशी उघडीप मिळण्याची शक्यता आहे.

३ ऑगस्टपासून पावसाचा दुसरा टप्पा

३ ऑगस्टपासून राज्यात पावसाचा पुन्हा जोर वाढण्याची शक्यता आहे. संपूर्ण विदर्भ तसेच मराठवाड्यातील बीड, लातूर, धाराशिव आणि नांदेड जिल्ह्यांसह महाराष्ट्रातील इतर भागांतही पावसाचे प्रमाण वाढण्याचा अंदाज आहे. ५ ते ८ ऑगस्टदरम्यान पावसाची व्याप्ती आणखी वाढण्याची शक्यता असून, राज्यातील बहुतांश भागांत चांगला पाऊस होण्याची शक्यता वर्तविण्यात आली आहे.

विहिरींच्या पाणीपातळीत वाढ होण्याची शक्यता

आगामी पावसामुळे विहिरींच्या पाणीपातळीत वाढ होण्याची शक्यता असून, जलसाठ्याच्या दृष्टीने हा कालावधी महत्त्वाचा ठरणार आहे. मात्र, अतिवृष्टी होणाऱ्या भागातील शेतकऱ्यांनी पिकांचे नुकसान टाळण्यासाठी आवश्यक खबरदारी घेणे गरजेचे आहे.

शेतीकामांचे नियोजन करताना दक्षता आवश्यक

पावसाचा अंदाज लक्षात घेऊन शेतकऱ्यांनी खत व्यवस्थापन, फवारणी आणि अन्य शेतीकामांचे नियोजन करावे. नदीकाठच्या तसेच गोदावरी व इतर जलप्रवाहांच्या परिसरातील शेतकऱ्यांनी पाण्याच्या वाढत्या प्रवाहाबाबत विशेष दक्षता घ्यावी. स्थानिक परिस्थितीनुसार प्रशासन आणि भारतीय हवामान विभागाकडून जारी करण्यात येणाऱ्या अधिकृत सूचनांचे पालन करण्याचे आवाहन करण्यात आले आहे.