सांगली, दि. १ : स्थानिक गुन्हे अन्वेषण शाखा, सांगली आणि सांगली ग्रामीण पोलिस ठाण्याच्या संयुक्त कारवाईत गांजा विक्री करणाऱ्या रेकॉर्डवरील आरोपीला अटक करण्यात आली. या कारवाईत ४ किलो ९६३ ग्रॅम गांजा तसेच चारचाकी वाहन असा एकूण ५ लाख ८० हजार रुपयांचा मुद्देमाल जप्त करण्यात आला.
अटक करण्यात आलेल्या आरोपीचे नाव सचिन दादासो चव्हाण (वय ३४, रा. गांधीनगर, मराठी शाळेजवळ, कवठेपिरान, ता. मिरज, जि. सांगली) असे आहे. त्याच्याविरुद्ध सांगली ग्रामीण पोलिस ठाण्यात एनडीपीएस कायद्यान्वये गुन्हा दाखल करण्यात आला आहे.
स्थानिक गुन्हे अन्वेषण शाखेचे सहायक पोलिस निरीक्षक प्रशांत निशाणदार यांना मिळालेल्या गोपनीय माहितीनुसार, लक्ष्मी फाट्याजवळील महालक्ष्मी मंदिर परिसरात आरोपी गांजाची विक्री करण्यासाठी येणार असल्याची माहिती मिळाली होती. त्यानुसार सापळा रचून पोलिसांनी संशयित चारचाकी वाहन अडविले. वाहनाची झडती घेतली असता त्यामध्ये प्लास्टिकच्या पिशवीत ठेवलेला ४ किलो ९६३ ग्रॅम तयार गांजा आढळून आला.
या कारवाईत सुमारे १ लाख ८० हजार रुपये किमतीचा गांजा आणि ४ लाख रुपये किमतीची रेनॉ ह्युंडाई आय-२० चारचाकी जप्त करण्यात आली.
सदर कारवाई पोलीस अधीक्षक सुहेल शर्मा, अपर पोलीस अधीक्षक कल्पना बावचकर यांच्या मार्गदर्शनाखाली स्थानिक गुन्हे अन्वेषण शाखेचे सहायक पोलिस निरीक्षक प्रशांत निशाणदार, पोलिस उपनिरीक्षक महादेव पवार तसेच त्यांच्या पथकाने केली.
पोलिसांनी आरोपीविरुद्ध गुन्हा दाखल केला असून पुढील तपास सांगली ग्रामीण पोलिस ठाणे करीत आहे. आरोपी हा रेकॉर्डवरील गुन्हेगार असून त्याच्यावर यापूर्वीही विविध गुन्हे दाखल असल्याची माहिती पोलिसांनी दिली.
टिप्पणी पोस्ट करा
0टिप्पण्या