करजगीतील चार वर्षीय चिमुरडीवरील अत्याचार व हत्याप्रकरणी आरोपीला मरेपर्यंत फाशी ; महाराष्ट्रातील दुसऱ्या प्रकरणात कठोर शिक्षा; सरकारी वकील प्रमोद भोकरे यांचा प्रभावी युक्तिवाद

 

प्रतिष्ठा न्यूज

सांगली, प्रतिनिधी : जत तालुक्यातील करजगी गावात चार वर्षीय निष्पाप चिमुरडीवर लैंगिक अत्याचार करून तिचा निर्घृण खून करणाऱ्या आरोपीला सांगली जिल्हा व सत्र न्यायालयाने  "मरेपर्यंत फाशी" ही अत्यंत कठोर शिक्षा सुनावली आहे. जिल्हा व सत्र न्यायालयातील बाल लैंगिक अत्याचार प्रतिबंधक (POCSO) विशेष न्यायालयाने हा ऐतिहासिक निकाल दिला. पुण्यातील नसरापूर प्रकरणानंतर महाराष्ट्रात अशा प्रकारची शिक्षा सुनावण्यात आलेले हे दुसरे प्रकरण ठरले आहे.

पांडुरंग सोमना कळ्ळी (वय ४६, रा. करजगी, ता. जत) असे दोषी आरोपीचे नाव आहे. न्यायालयाने भारतीय न्याय संहिता (BNS) २०२३ मधील कलम १०३(१), २३८, ६५(२), १२७(२) तसेच लैंगिक अपराधांपासून बालकांचे संरक्षण (POCSO) कायद्यातील कलम ४, ५(आय), ६, ८ व १२ अंतर्गत आरोपीला दोषी ठरवत **मरेपर्यंत फाशीची शिक्षा** सुनावली.

खेळता खेळता चिमुरडी आरोपीच्या तावडीत

६ फेब्रुवारी २०२५ रोजी सकाळी साडेदहा ते दुपारी दीडच्या दरम्यान ही हृदयद्रावक घटना घडली होती. चार वर्षे तीन महिन्यांची पीडित बालिका आपल्या आठ वर्षीय मैत्रिणीसोबत घराबाहेर खेळत होती. दोघी खेळत खेळत आरोपीच्या घरासमोरील बदामाच्या झाडाखाली बदाम गोळा करण्यासाठी गेल्या. त्यावेळी मोठ्या मुलीला तिच्या आईने शाळेसाठी घरी बोलावल्याने ती निघून गेली. याच संधीचा फायदा घेत आरोपीने एकटी असलेल्या चिमुरडीला आपल्या घरात नेले.

तेथे तिच्यावर अमानुष लैंगिक अत्याचार करून तिच्या गुप्तांगाला गंभीर दुखापत केली आणि तिचा खून केला. त्यानंतर गुन्ह्याचे पुरावे नष्ट करण्याच्या उद्देशाने मृतदेह पोत्यात भरून प्लास्टिकमध्ये गुंडाळला आणि आपल्या घरातील लोखंडी पेटीत लपवून ठेवला.

शोधमोहीमेत सहभागी होऊनही संशयाच्या भोवऱ्यात

घटनेच्या वेळी पीडित बालिकेची आई कर्नाटकातील मुधोळ येथे माहेरी गेली होती, तर वडील बांधकामाच्या कामासाठी रत्नागिरी येथे होते. त्यामुळे चिमुरडी आजीकडे राहत होती. बालिका अचानक बेपत्ता झाल्यानंतर कुटुंबीयांनी आणि ग्रामस्थांनी गावभर शोधमोहीम सुरू केली. पोलिसांनाही तातडीने माहिती देण्यात आली. विशेष म्हणजे आरोपी पांडुरंग कळ्ळी स्वतः गावकऱ्यांसोबत शोधमोहीमेत सहभागी झाला होता. मात्र त्याच्या हालचाली संशयास्पद वाटल्याने पोलिसांनी त्याची कसून चौकशी केली. सुरुवातीला आरोपीने पोलिसांची दिशाभूल करण्याचा प्रयत्न केला. मात्र पोलिसांनी पुराव्यांच्या आधारे चौकशीचा फास आवळताच त्याने गुन्ह्याची कबुली दिली. त्याच्या घरातील लोखंडी पेटीत प्लास्टिकच्या पिशवीत लपवून ठेवलेला पीडितेचा मृतदेह पोलिसांनी जप्त केला.

अवघ्या १५ दिवसांत तपास पूर्ण

या क्रूर घटनेने संपूर्ण सांगली जिल्हा हादरला होता. आरोपीला कठोर शिक्षा व्हावी, यासाठी विविध सामाजिक संघटना, महिला संघटना आणि नागरिकांनी तीव्र आंदोलन केले होते.

घटनेचे गांभीर्य लक्षात घेऊन पोलिसांनी वेगाने तपास पूर्ण करत  अवघ्या १५ दिवसांत दोषारोपपत्र न्यायालयात दाखल केले. वैज्ञानिक पुरावे, वैद्यकीय अहवाल, परिस्थितीजन्य पुरावे आणि साक्षीदारांच्या जबाबांच्या आधारे आरोपीविरुद्ध भक्कम खटला उभारण्यात आला.

सरकारी पक्षाचा प्रभावी युक्तिवाद

सरकारी वकील प्रमोद भोकरे यांनी न्यायालयात प्रभावी बाजू मांडताना आरोपीचा पूर्वीचा गुन्हेगारी इतिहास, अल्पवयीन मुलीवर केलेले क्रूर अत्याचार, गुन्हा लपविण्याचा प्रयत्न आणि समाजमनाला हादरवून सोडणाऱ्या या घटनेचे गांभीर्य अधोरेखित केले. आरोपीला कमाल शिक्षा देण्याची मागणी त्यांनी न्यायालयाकडे केली.

साक्षीपुरावे, फॉरेन्सिक अहवाल, वैद्यकीय निष्कर्ष आणि तपासातील सर्व पुरावे ग्राह्य धरत न्यायालयाने आरोपीला दोषी ठरवून **"मरेपर्यंत फाशी"** ही कठोर शिक्षा सुनावली.

## न्यायालयाच्या निर्णयाचे सर्वत्र स्वागत

या निकालानंतर पीडित कुटुंबीयांनी न्याय मिळाल्याची भावना व्यक्त केली असून, विविध सामाजिक संघटना आणि नागरिकांनी न्यायालयाच्या निर्णयाचे स्वागत केले आहे. बालकांवरील लैंगिक अत्याचार आणि निर्घृण हत्येसारख्या गुन्ह्यांमध्ये कठोर शिक्षा देण्याचा हा निकाल न्यायव्यवस्थेच्या दृढ भूमिकेचे प्रतीक मानला जात असून, अशा गुन्ह्यांना आळा बसण्यासाठी हा निर्णय महत्त्वपूर्ण ठरणार असल्याची प्रतिक्रिया व्यक्त होत आहे.