जिल्ह्यात विविध ठिकाणी रोजगार व स्वयंरोजगार मेळाव्याचे आयोजन - जास्तीत जास्त सुशिक्षित बेरोजगारांनी मेळाव्याचा लाभ घेण्याचे आवाहन

प्रतिष्ठा न्यूज 

सांगली दि. 20 : जिल्हा कौशल्य विकास, रोजगार व उद्योजकता मार्गदर्शन केंद्र, सांगली तसेच औद्योगिक प्रशिक्षण संस्था यांच्या संयुक्त विद्यमाने जिल्ह्यात विविध ठिकाणी प्लेसमेंट ड्राईव्ह / रोजगार व स्वयंरोजगार मेळाव्याचे आयोजन करण्यात आले आहे. जिल्ह्यातील जास्तीत जास्त सुशिक्षित बेरोजगारांनी या संधीचा लाभ घ्यावा, असे आवाहन जिल्हा कौशल्य विकास, रोजगार व उद्योजकता मार्गदर्शन केंद्राच्या सहायक आयुक्त इनुजा शेख यांनी प्रसिध्दीपत्रकाव्दारे केले आहे.

            दहावी, बारावी, आयटीआय, डिप्लोमा, ग्रॅज्युएट व पोस्ट ग्रॅज्युएट या प्रकारची शैक्षणिक पात्रता असणाऱ्या आणि जिल्ह्यातील रोजगार इच्छुक उमेदवारांसाठी विविध पदांकरीता रोजगार मेळाव्यामध्ये उपस्थित उद्योजकांकडे प्रत्यक्ष मुलाखती घेण्यात येणार आहेत. नियोजित कार्यक्रमानुसार रोजगार मेळावा संबंधित तालुक्यातील शासकीय औद्योगिक प्रशिक्षण संस्था येथे होणार आहे. यामध्ये शिराळा व उरूण ईश्वरपूर येथे 23 फेब्रुवारी 2026 रोजी, विटा व कडेगाव येथे 25 फेब्रुवारी 2026, सांगली येथे 27 फेब्रुवारी 2026, आटपाडी येथे 2 मार्च 2026, पलूस व तासगाव येथे 4 मार्च 2026, तर जत व कवठेमहांकाळ येथे 6 मार्च 2026. या सर्व ठिकाणी हा मेळावा सकाळी 11 ते दुपारी 1 या वेळेत आयोजित करण्यात येणार आहे.

            मेळाव्याच्या ठिकाणी प्रत्यक्ष मुलाखतीस येताना उमेदवारांनी आपली सर्व मूळ कागदपत्रे, पासपोर्ट साईज फोटो आणि बायोडाटाच्या किमान तीन छायांकित प्रती सोबत घेऊन याव्यात. अधिक माहितीसाठी जिल्हा कौशल्य विकास, रोजगार व उद्योजकता मार्गदर्शन केंद्र, मध्यवर्ती प्रशासकीय इमारत, तळमजला, विजयनगर, सांगली येथे संपर्क साधावा (संपर्क क्रमांक : 0233-2990383), असे प्रसिध्दी पत्रकात म्हटले आहे.