काळी खणमध्ये ‘सखी संध्या’; महिलांच्या उद्यमशीलतेला आणि सांगलीकरांच्या कलागुणांना मिळणार व्यासपीठ ; २१ सप्टेंबरला सायंकाळी ६ वाजता शुभारंभ ; मुक्त कलाविष्काराची मेजवानी

प्रतिष्ठा न्यूज 

सांगली : सांगली शहराच्या सौंदर्यात भर घालणाऱ्या ‘द इव्हिनिंग रिट्रीट’ अर्थात काळी खण परिसरात आता दररोजच्या संध्याकाळीला नवा रंग मिळणार आहे. सांगली–मिरज–कुपवाड शहर महानगरपालिकेच्या वतीने नागरिकांसाठी ‘सखी संध्या – महिलांच्या उद्यमशीलतेला व्यासपीठ, सांगलीकरांसाठी मनोरंजनाची मेजवानी’ हा अभिनव उपक्रम सुरू करण्यात येत आहे. या उपक्रमाचा शुभारंभ सोमवार, दि. २१ सप्टेंबर २०२६ रोजी सायंकाळी ६ वाजता महापौर, उपमहापौर, पदाधिकारी, सदस्य तसेच महापालिका आयुक्त, अधिकारी व कर्मचारी यांच्या उपस्थितीत होणार आहे.

काळी खण परिसर नागरिकांसाठी अधिक आनंददायी, कौटुंबिक आणि मनोरंजनात्मक बनविण्याच्या उद्देशाने हा उपक्रम राबविण्यात येत आहे. या माध्यमातून नागरिकांना निसर्गरम्य वातावरणात कुटुंबासोबत निवांत वेळ घालविण्याबरोबरच विविध खाद्यपदार्थ, मनोरंजन आणि स्थानिक कलागुणांचा आनंद घेता येणार आहे.

महिला बचत गटांना व्यवसायाची संधी

‘सखी संध्या’चे प्रमुख आकर्षण म्हणजे महिला बचत गटांना उपलब्ध करून देण्यात येणारे स्टॉल. महिला बचत गटांच्या माध्यमातून तयार करण्यात आलेली विविध उत्पादने आणि घरगुती खाद्यपदार्थ नागरिकांपर्यंत थेट पोहोचविण्याची संधी मिळणार आहे.

यामध्ये घरगुती खाद्यपदार्थ, मिठाई, विविध चवदार पदार्थ तसेच महिला बचत गटांनी तयार केलेल्या उत्पादनांचा समावेश असणार आहे. त्यामुळे महिलांच्या कौशल्याला बाजारपेठ मिळण्याबरोबरच त्यांच्या उद्यमशीलतेला आणि स्वावलंबनाला प्रोत्साहन मिळणार आहे.

लहान मुलांसाठीही मनोरंजनाची रेलचेल

काळी खण येथे येणाऱ्या कुटुंबांसाठी लहान मुलांसाठीही विविध मनोरंजनात्मक उपक्रम उपलब्ध करून देण्यात येणार आहेत. इलेक्ट्रिक गाडी, ट्रॅम्पोलिन, बलून, एअरगन यांसह विविध मनोरंजनाच्या सुविधा असणार आहेत.

त्यामुळे कुटुंबातील प्रत्येक सदस्याला आपल्या आवडीप्रमाणे मनोरंजनाचा आनंद घेता येणार आहे.

सांगलीकरांच्या कलागुणांना मिळणार खुले व्यासपीठ

‘सखी संध्या’चे आणखी एक वैशिष्ट्य म्हणजे सांगलीकरांच्या कलागुणांसाठी खुले व्यासपीठ. नागरिकांना आपल्या आवडीची गाणी, विनोद, जोक्स तसेच इतर कलागुण सादर करण्याची संधी या व्यासपीठावर मिळणार आहे.

यामुळे काळी खण हा केवळ पर्यटन किंवा विरंगुळ्याचा परिसर न राहता नागरिकांच्या सहभागातून सांस्कृतिक आणि मनोरंजनात्मक उपक्रमांचे केंद्र बनविण्याचा प्रयत्न करण्यात येत आहे.

प्रवेश विनामूल्य; दररोज संध्याकाळी अनुभवता येणार ‘सखी संध्या’

सद्यस्थितीत ‘सखी संध्या’साठी नागरिकांना विनामूल्य प्रवेश देण्यात येत आहे. हा नियमित स्वरूपाचा उपक्रम असून नागरिकांनी आपल्या दैनंदिन धावपळीतून काही निवांत क्षण अनुभवण्यासाठी दररोज सायंकाळी काळी खण येथे यावे, असे आवाहन महापालिका प्रशासनाने केले आहे.

नागरिकांनी महिला बचत गटांच्या उत्पादनांना प्रोत्साहन द्यावे, घरगुती खाद्यपदार्थांचा आस्वाद घ्यावा, विविध मनोरंजनात्मक उपक्रमांचा आनंद घ्यावा तसेच आपल्या कलागुणांना खुले व्यासपीठावर सादर करावे, असेही प्रशासनाने म्हटले आहे.

स्वच्छता व सार्वजनिक शिस्त राखण्याचे आवाहन

काळी खण परिसरातील स्वच्छता, सौंदर्य, पर्यावरण आणि सार्वजनिक शिस्त कायम राखण्यासाठी नागरिकांनी महापालिका प्रशासनास सहकार्य करावे, असे आवाहन करण्यात आले आहे.

‘दर संध्याकाळी काळी खणला या… निवांत क्षण जगा, आनंद घ्या आणि आपल्या कलागुणांना वाव द्या!’ या संकल्पनेतून ‘सखी संध्या’ सांगलीकरांसाठी रोजच्या संध्याकाळीचा आनंददायी अनुभव ठरणार आहे.

शुभारंभ सोहळा

📍 स्थळ : ‘द इव्हिनिंग रिट्रीट’ – काळी खण, सांगली

📅 दिनांक : २१ सप्टेंबर २०२६

⏰ वेळ : सायंकाळी ६ वाजता

महापौर, उपमहापौर, महानगरपालिकेचे पदाधिकारी व सदस्य तसेच महापालिका आयुक्त, अधिकारी व कर्मचारी यांच्या प्रमुख उपस्थितीत शुभारंभ होणार आहे.

“काळी खणला चला… थोडा वेळ स्वतःसाठी, कुटुंबासाठी आणि आपल्या शहरासाठी!”