“इतिहास, निसर्ग आणि संस्कृतीचा संगम! रावल बी.एड. कॉलेजच्या शैक्षणिक सहलीत विद्यार्थ्यांचा समृद्ध अनुभव”

प्रतिष्ठा न्यूज/किरण कुंभार 

तासगाव:येथील श्रीमंत राजे दौलतसिंहजी रावल बी.एड. कॉलेजच्या विद्यार्थ्यांसाठी एक दिवसीय शैक्षणिक सहल व क्षेत्रभेटीचे यशस्वी आयोजन करण्यात आले. इतिहास, संस्कृती, पर्यावरण आणि सामाजिक जाण यांचा प्रत्यक्ष अनुभव देणारी ही सहल विद्यार्थ्यांसाठी अत्यंत उपयुक्त ठरली.बी.एड. अभ्यासक्रमातील पर्यावरण अभ्यास विषयाच्या अनुषंगाने या सहलीचे नियोजन करण्यात आले होते. प्रथम वर्षातील सर्व विद्यार्थी उत्साहात या सहलीत सहभागी झाले होते.सहलीची सुरुवात चाळीसगावजवळील पाटणा परिसरातील गौताळा अभयारण्यात असलेल्या चंडिका देवी (पाटणादेवी) मंदिराच्या भेटीने झाली. अर्धगोलाकार डोंगररांगांनी वेढलेल्या या निसर्गरम्य ठिकाणी विद्यार्थ्यांनी मंदिराच्या हेमाडपंथी स्थापत्यशैलीचा अभ्यास करत सांस्कृतिक व ऐतिहासिक वारशाची माहिती घेतली.यानंतर विद्यार्थ्यांनी वालझिरी येथे भेट देत महर्षी वाल्मिकी मंदिर, गोरक्षनाथ मंदिर, दत्त मंदिर आणि राम मंदिरांचे दर्शन घेतले. विविध धार्मिक स्थळांच्या माध्यमातून भारतीय संस्कृतीतील विविधता अनुभवण्याची संधी विद्यार्थ्यांना मिळाली.

पुढे चाळीसगाव येथील कलामहर्षी केकी मूस कलादालन व सांस्कृतिक केंद्र येथे भेट देण्यात आली. येथे विद्यार्थ्यांनी केकी मूस यांच्या कलाकृतींचे बारकाईने निरीक्षण करत लाकडी काम, पुतळे, दुर्मिळ वस्तू, जुनी भांडी, खेळणी, फर्निचर व नाण्यांविषयी सविस्तर माहिती जाणून घेतली.सहलीच्या शेवटच्या टप्प्यात धुळे येथील वि. का. राजवाडे वस्तुसंग्रहालयाला भेट देऊन विद्यार्थ्यांनी इतिहासकालीन दुर्मिळ वस्तूंचा अभ्यास केला.यावेळी महाविद्यालयाचे प्राचार्य प्रमोद बोरसे यांनी विद्यार्थ्यांना मार्गदर्शन करताना सांगितले की, “अशा क्षेत्रभेटींमुळे अभ्यासातून थोडा विरंगुळा मिळतो, विविध संस्कृतींची ओळख होते आणि विद्यार्थ्यांमध्ये सामाजिक व पर्यावरणीय जाणीव विकसित होते.”या सहलीचे यशस्वी आयोजन प्रा. निशा ठाकूर यांनी केले. तसेच प्रा. डॉ. एम. एस. उभाळे, प्रा. रविंद्र पाटील, प्रा. रवींद्र वळवी, प्रा. रेवती बागुल व प्रा. सुनिता वळवी यांनी सहकार्य केले. प्रशासकीय सेवक कृष्णा बागुल, शंकर गिरासे, अमर राजपूत व वीरपाल गिरासे यांनीही मोलाचे योगदान दिले.