सांगली जिल्ह्यात गणरायाचे उत्साहात आगमन ; सहा हजारांहून अधिक सार्वजनिक मंडळांची प्रतिष्ठापना; ‘डीजे’ला फाटा, पारंपरिक वाद्यांना पसंती

सराफ पेठेतील श्री गणेशाची प्रतिष्ठापना 

(छायाचित्र - रवि काळेबेरे)

प्रतिष्ठा न्यूज 

सांगली प्रतिनिधी : सांगली शहरासह संपूर्ण जिल्ह्यात गणेश चतुर्थीनिमित्त लाडक्या गणरायाचे अत्यंत उत्साहात, भक्तिमय आणि पारंपरिक वातावरणात आगमन झाले. ढोल-ताशांचा गजर, लेझीम पथकांचे सादरीकरण, फुलांची आकर्षक सजावट आणि ‘गणपती बाप्पा मोरया’च्या जयघोषात सार्वजनिक गणेश मंडळांनी श्रींची प्रतिष्ठापना केली. यंदा जिल्ह्यात सहा हजारांहून अधिक सार्वजनिक गणेश मंडळांनी बाप्पाची मोठ्या थाटामाटात प्रतिष्ठापना केली आहे. त्याचबरोबर घरोघरीही गणरायाचे वाजत-गाजत आणि पारंपरिक पद्धतीने स्वागत करण्यात आले.

डीजेला फाटा; पारंपरिक वाद्यांना पसंती

यंदाच्या गणेशोत्सवात ध्वनी प्रदूषणाला आळा घालण्याच्या दृष्टीने अनेक प्रमुख मंडळांनी डीजे आणि डॉल्बी सिस्टीमला फाटा देत पारंपरिक वाद्यांना पसंती दिली. स्वागत मिरवणुकीत ढोल-ताशा पथके, लेझीम, बंको तसेच पारंपरिक बँड पथकांचा उत्साह दिसून आला.

पारंपरिक वाद्यांच्या तालावर तरुणाईसह नागरिकांनी उत्स्फूर्त सहभाग घेतला. त्यामुळे गणेश आगमन मिरवणुकांना भक्ती, संस्कृती आणि परंपरेची किनार लाभली. अनेक मंडळांनी ध्वनी प्रदूषण टाळण्याचा घेतलेला निर्णय हा इतर मंडळांसाठीही आदर्श ठरत आहे.

बाजारपेठांमध्ये खरेदीसाठी मोठी गर्दी

गणेशोत्सवाच्या पूर्वसंध्येला सांगली आणि मिरज शहरातील प्रमुख बाजारपेठांमध्ये खरेदीसाठी नागरिकांची मोठी गर्दी झाली होती. पूजा साहित्य, फुले, हार, दुर्वा, मोदक, मिठाई तसेच गणेशमूर्तींच्या सजावटीसाठी लागणाऱ्या विविध वस्तू खरेदी करण्यासाठी नागरिकांची लगबग सुरू होती.

फुलांच्या बाजारपेठेतही मोठी गर्दी दिसून आली. गणरायाच्या स्वागतासाठी घरांची तसेच सार्वजनिक मंडपांची आकर्षक सजावट करण्यात आली असून, विविध मंडळांनी यंदाही सामाजिक, धार्मिक आणि प्रबोधनात्मक देखावे साकारण्याची तयारी केली आहे.

सुरक्षा आणि वाहतूक व्यवस्थेवर प्रशासनाचा भर

गणेशोत्सवाच्या काळात सार्वजनिक मंडळांचे देखावे पाहण्यासाठी मोठ्या प्रमाणावर गर्दी होण्याची शक्यता लक्षात घेऊन जिल्हा प्रशासन आणि पोलिस यंत्रणेकडून सुरक्षा व्यवस्था करण्यात आली आहे. सांगली आणि मिरज शहरातील वाहतूक सुरळीत राहावी यासाठी विविध मार्गांवर वाहनांसाठी मनाई आदेश तसेच वाहतुकीतील आवश्यक बदल लागू करण्यात आले आहेत.

गणेशोत्सव शांततेत आणि उत्साहात पार पडावा यासाठी पोलिसांकडून मंडळांना नियमांचे पालन करण्याचे आवाहन करण्यात आले आहे. ध्वनी प्रदूषण करणाऱ्या तसेच नियमांचे उल्लंघन करणाऱ्या काही मंडळांविरुद्ध सांगली ग्रामीण पोलिसांनी कायदेशीर कारवाई करत गुन्हे दाखल केले आहेत.

भक्तिमय वातावरणात उत्सवाला सुरुवात

गणरायाच्या आगमनाने सांगली जिल्ह्यात सर्वत्र उत्साहाचे आणि भक्तिमय वातावरण निर्माण झाले आहे. पुढील दिवसांत विविध सार्वजनिक गणेश मंडळांकडून धार्मिक, सांस्कृतिक आणि सामाजिक उपक्रमांचे आयोजन केले जाणार असून, नागरिकांमध्येही या उपक्रमांबाबत उत्सुकता आहे. पारंपरिक वाद्यांचा निनाद, सामाजिक संदेश देणारे उपक्रम आणि पर्यावरणपूरक गणेशोत्सवाच्या माध्यमातून यंदाचा उत्सव अधिक विधायक करण्याचा प्रयत्न होताना दिसत आहे.