आमदारांकडून जाहीरपणे जीवे मारण्याची धमकी; स्वतःहून गुन्हा नोंदविण्याची मागणी ;भाजपचे जिल्हा उपाध्यक्ष परशुरामसिंग रजपूत यांचे पोलीस महानिरीक्षकांना पत्र

प्रतिष्ठा न्यूज / दीपक शिंत्रे   

विजयपूर : स्वतःच्या कष्टातून कमावलेल्या पैशांतून सोने घातले तर त्यात गैर काय? असे विचारत, आपल्याला उद्देशून ‘संपवून टाकेन’ अशी धमकी आमदार बसनगौडा पाटील यत्नाळ यांनी जाहीरपणे दिल्याचा आरोप भाजपचे जिल्हा उपाध्यक्ष तथा विजयपूर नगरपालिकेचे माजी अध्यक्ष परशुरामसिंग रजपूत यांनी केला. आमदारांच्या कथित धमकीच्या पार्श्वभूमीवर पोलिसांनी तातडीने स्वतःहून (स्वयंप्रेरणेने) गुन्हा नोंदवावा, अशी मागणी आपण पोलीस महानिरीक्षकांना पत्र लिहून करणार असल्याचे त्यांनी सांगितले.

  पत्रकार परिषदेत बोलताना रजपूत म्हणाले की, आमदार यत्नाळ यांनी अत्यंत खालच्या दर्जाच्या भाषेचा वापर करून आपल्याला जीवे मारण्याची धमकी दिली आहे. आमदारांच्या म्हणण्यानुसार, रजपूत यांच्या पाठीशी कोणीही नाही. त्यामुळे पोलिसांनी मला संरक्षण द्यावे आणि जाहीरपणे धमकी दिल्याप्रकरणी आमदारांविरुद्ध स्वतःहून गुन्हा नोंदवावा, अशी मागणी त्यांनी केली.

### गोशाळेच्या नावाखाली भ्रष्टाचार केल्याचा आरोप

‘सत्यवादी’ म्हणून स्वतःची प्रतिमा मिरवणाऱ्या यत्नाळ यांनी गोशाळेच्या नावाखाली भ्रष्टाचार केल्याचा आरोप रजपूत यांनी केला. लीज प्रकरणाच्या संदर्भात गोशाळेच्या नावाखाली पैसे गोळा करण्यात आल्याचा दावा करत, त्यावेळी आपण विरोध केला होता, असे ते म्हणाले. गोशाळेच्या नावाखाली पैसे घेतले तरी आपले कोणी काही बिघडवू शकत नाही, अशा गर्विष्ठ भूमिकेतून यत्नाळ यांनी वक्तव्य केल्याचा आरोपही त्यांनी केला.

गोमातेच्या नावाखाली पैसे गोळा करून गोशाळा सुरू करण्यात आली असून, अशा प्रकारांना हिंदुत्व म्हणता येणार नाही. यत्नाळ यांचे हिंदुत्व बनावट असल्याची टीका राजपूत यांनी केली.

### शहरातील मूलभूत सुविधांकडे दुर्लक्ष

शहरातील रस्त्यांची अवस्था खराब असून, मोजके रस्ते वगळता अनेक ठिकाणी रस्त्यांची दुरवस्था आहे. आमदारांनी एकदा आझाद रस्त्याची पाहणी करावी. भूमिगत केबल व्यवस्था अद्याप स्वप्नच राहिली असून, अनेक ठिकाणी विद्युत तारा लोंबकळत आहेत. शहरात पाणीटंचाईची समस्याही गंभीर बनली आहे, 

या प्रश्नांवर उपाययोजना करण्याऐवजी आमदार यत्नाळ हे केवळ शिवीगाळ आणि टीका करण्यातच व्यस्त असल्याचा आरोप त्यांनी केला.

### जेसीबी पक्षाच्या घोषणेवरून टीका

गणेशोत्सवादरम्यान नवीन पक्षाची घोषणा करण्याचे सांगणाऱ्या यत्नाळ यांनी दसरा सण येऊनही जेसीबी पक्षाची घोषणा केलेली नाही. दुसरीकडे, अद्याप स्थापन न झालेल्या पक्षाचे उमेदवार जाहीर करणे हास्यास्पद असल्याची टीका राजपूत यांनी केली.

 *लीज नूतनीकरण प्रकरणाची एसआयटी चौकशी करा*

एलबीएस बाजार संकुल आणि जलनगर येथील व्यावसायिक संकुलातील लीज नूतनीकरणाच्या प्रक्रियेत कोट्यवधी रुपयांचा कथित गैरव्यवहार झाल्याचा आरोप रजपूत यांनी केला. या प्रकरणात शहराचे आमदारही सहभागी असल्याचा दावा करत, संपूर्ण प्रकरणाची विशेष तपास पथकामार्फत (एसआयटी) चौकशी झाल्यास सत्य बाहेर येईल, असे ते म्हणाले.

  एलबीएस बाजार संकुलातील कथित गैरव्यवहार आणि आमदारांच्या हिंदुत्वाच्या भूमिकेवर प्रश्न उपस्थित केल्यामुळेच आपल्याला संपवून टाकण्याची धमकी देण्यात आल्याचा आरोपही त्यांनी केला.

  युवकांनी यत्नाळ यांच्या मागे लागून स्वतःवर गुन्हे दाखल करून घेऊन आपले भविष्य खराब करू नये, असे आवाहन रजपूत यांनी केले. यत्नाळ आंदोलनाचे आवाहन करतात आणि नंतर स्वतः निघून जातात, असा आरोपही त्यांनी केला. यापूर्वी विजय सोहळ्याच्या वेळी आपल्याविरुद्ध गुन्हा दाखल झाल्यानंतर संबंधित व्यक्ती कोल्हापूरला निघून गेल्याचेही त्यांनी सांगितले.

यत्नाळ यांनी भाजपचे प्रदेशाध्यक्ष बी.वाय. विजयेंद्र यांच्यावर टीका करण्याचा नैतिक अधिकार नाही. माजी मुख्यमंत्री बी.एस. येडियुरप्पा यांच्याशी विजयेंद्र आणि बी.एस. राघवेंद्र हे ज्या आदराने व आपुलकीने वागतात, ते संपूर्ण राज्याला माहीत आहे, असे रजपूत म्हणाले.

### गाणिग समाजाबद्दल अपमानास्पद वक्तव्य केल्याचा आरोप

**गाणिग समाजाबद्दल आमदार यत्नाळ यांनी अपमानास्पद वक्तव्य केल्याचा आरोप युवा नेते नंदू गडगी यांनी केला.**

पत्रकार परिषदेत बोलताना गडगी म्हणाले की, गाणिग समाजाबद्दल अशा प्रकारे बोलणे अक्षम्य आहे. ‘एक व्यक्ती गेली तर काय फरक पडतो?’ अशा अर्थाचे वक्तव्य करून समाजाचा अवमान करण्यात आल्याचा आरोप त्यांनी केला.

आमदार यत्नाळ यांच्याविरोधात ॲड. खाद्री यांनी भूमिका घेतली, तेव्हा त्यांच्या समर्थकांनी मौन बाळगले होते. त्यावेळी आपण विरोध केला होता; मात्र आज आपल्याशीही अशाच प्रकारे वागणूक दिली जात असल्याचे गडगी म्हणाले.

यत्नाळ यांच्या आसपास कमिशन एजंटांचा भरणा असल्याचा आरोप करत, हिंदू युवकांची दिशाभूल करू नये, असे आवाहनही त्यांनी केले.