संजयकाकांच्या आदेशानुसार कुमार शेटेंचा तासगाव अर्बन बँकेच्या चेअरमनपदाचा राजीनामा !!!अध्यक्षपदाच्या कार्यकाळात आर्थिक प्रगतीला गती

प्रतिष्ठा न्यूज/किरण कुंभार 

तासगाव :तासगाव अर्बन बँकेच्या अध्यक्षपदाची धुरा स्वीकारल्यानंतर अवघ्या वर्षभराच्या कालावधीत बँकेच्या आर्थिक प्रगतीला गती देत ठेवींमध्ये तब्बल ४५ कोटी रुपयांची ऐतिहासिक वाढ नोंदविण्यात आली आहे. भागभांडवलात ९० लाख रुपये, तर कर्जवाटपात ३३ कोटी रुपयांची वाढ झाली आहे. बँकेच्या इतिहासात प्रथमच ठेवींमध्ये एवढी मोठी वाढ झाल्याचा दावा अध्यक्षांनी केला आहे. दरम्यान, नेते संजय (काका) पाटील यांच्या आदेशानुसार आपण चेअरमनपदाचा राजीनामा दिल्याचे त्यांनी स्पष्ट केले आहे.

दि. २५ सप्टेंबर २०२५ पासून तासगाव अर्बन बँकेच्या अध्यक्षपदाची जबाबदारी सांभाळताना बँकेच्या आर्थिक विस्तारासह पायाभूत सुविधांच्या विकासावर भर देण्यात आला. या कालावधीत बँकेच्या भागभांडवलात ९० लाख रुपयांची वाढ झाली. ठेवींमध्ये ४५ कोटी रुपयांची भर पडली, तर कर्जरक्कम ३३ कोटी रुपयांनी वाढली. ठेवींमधील ही वाढ बँकेच्या इतिहासातील महत्त्वपूर्ण टप्पा असल्याचे अध्यक्षांनी नमूद केले.

*कवठेमहांकाळला स्वतःची जागा; जत येथे इमारतीचे बांधकाम*

बँकेच्या शाखांच्या विकासाच्या दृष्टीनेही महत्त्वपूर्ण निर्णय घेण्यात आले. कवठेमहांकाळ शाखेसाठी स्वमालकीची जागा खरेदी करण्यात आली असून, जत शाखेच्या स्वमालकीच्या जागेवर नवीन इमारतीचे बांधकाम सुरू आहे. या निर्णयांमुळे बँकेच्या शाखांच्या पायाभूत सुविधांना बळ मिळणार आहे.

*कर्मचाऱ्यांच्या हितालाही प्राधान्य*

बँकेच्या आर्थिक प्रगतीसोबतच कर्मचाऱ्यांच्या हिताचाही विचार करण्यात आला. कर्मचाऱ्यांना १७ टक्के बोनस देण्याचा निर्णय घेण्यात आला. बँकेच्या प्रगतीमध्ये संचालक मंडळ, सभासद, ठेवीदार आणि कर्मचारी यांचे योगदान महत्त्वाचे असल्याचे अध्यक्षांनी सांगितले.

*सहकार्याबद्दल कृतज्ञता; संजयकाकांच्या आदेशानुसार राजीनामा*

आपल्या अध्यक्षपदाच्या कार्यकाळात सर्व संचालक, सभासद, ठेवीदार आणि कर्मचाऱ्यांचे मोलाचे सहकार्य लाभले. या सर्वांच्या सहकार्याबद्दल आपण सदैव ऋणी राहू, अशी भावना त्यांनी व्यक्त केली. तसेच, आपले नेते संजय (काका) पाटील यांच्या आदेशानुसार आपण चेअरमनपदाचा राजीनामा दिल्याचे स्पष्ट केले.

आर्थिक प्रगती, शाखा विस्तार आणि कर्मचाऱ्यांच्या हिताचे निर्णय या कामांचा उल्लेख करत अध्यक्षांनी आपल्या कार्यकाळाचा आढावा मांडला असून, त्यांच्या राजीनाम्यामुळे तासगाव अर्बन बँकेच्या नेतृत्वातील पुढील घडामोडींकडे लक्ष लागले आहे.