कडेपूर प्रतिनिधी : सांगली जिल्ह्याच्या राजकारणात आपल्या कार्याचा ठसा उमटविणाऱ्या देशमुख कुटुंबाच्या शिरपेचात आणखी एक मानाचा तुरा रोवला गेला आहे. सांगली जिल्हा मध्यवर्ती सहकारी बँकेच्या सर्वसाधारण महिला गटातून सौ. अपर्णाताई संग्रामसिंह देशमुख यांची संचालकपदी बिनविरोध निवड झाल्यानंतर कडेपूर येथील त्यांच्या निवासस्थानी शुभेच्छा देण्यासाठी अक्षरशः जनसागर उसळला. राजकीय, सामाजिक, सहकार, पत्रकारिता आणि क्रीडा क्षेत्रातील मान्यवरांसह स्व. संपतराव आण्णा देशमुख यांच्यावर निष्ठा असलेल्या कार्यकर्त्यांनी मोठ्या संख्येने उपस्थित राहून अपर्णाताईंवर शुभेच्छांचा वर्षाव केला.
आशिया खंडातील मोठ्या जलसिंचन प्रकल्पांपैकी एक असलेल्या टेंभू उपसा जलसिंचन योजनेच्या उभारणीत महत्त्वपूर्ण योगदान देणारे स्व. आमदार संपतराव आण्णा देशमुख यांच्या स्नुषा आणि सांगली जिल्हा परिषदेचे माजी अध्यक्ष संग्रामसिंह संपतराव देशमुख यांच्या सुविद्य पत्नी असलेल्या अपर्णाताई देशमुख यांच्या या निवडीला विशेष राजकीय महत्त्व प्राप्त झाले आहे.
सांगली जिल्हा परिषदेचे अध्यक्ष, जिल्हा बँकेचे उपाध्यक्ष तसेच संचालक म्हणून काम करताना संग्रामसिंह देशमुख यांनी आपल्या कार्यशैलीतून वेगळी ओळख निर्माण केली. सहकार क्षेत्रातील त्यांचा अनुभव, संघटन कौशल्य आणि जनसंपर्क यांची राजकीय वर्तुळात नेहमीच चर्चा राहिली आहे. त्यांच्या कार्याची दखल घेत मुख्यमंत्री देवेंद्र फडणवीस यांनीही अपर्णाताई देशमुख या जिल्हा बँकेच्या संचालक मंडळात असाव्यात, अशी ठाम भूमिका मांडल्याने त्यांच्या बिनविरोध निवडीला विशेष महत्त्व प्राप्त झाले.
अपर्णाताई देशमुख यांच्या निवडीची बातमी समजल्यानंतर पलूस-कडेगाव विधानसभा मतदारसंघासह सांगली जिल्ह्यातील विविध भागांतून त्यांचे अभिनंदन करण्यासाठी कार्यकर्ते, पदाधिकारी आणि हितचिंतक कडेपूर येथील निवासस्थानी दाखल झाले. राजकीय आणि सामाजिक क्षेत्रातील कार्यकर्ते, पत्रकार, खेळाडू तसेच स्व. संपतराव आण्णा देशमुख यांचे निष्ठावंत समर्थक यांनी उपस्थित राहून त्यांना पुढील वाटचालीसाठी शुभेच्छा दिल्या. निवडीच्या आनंदासोबतच कार्यकर्त्यांनी दाखविलेल्या प्रेमामुळे आणि आपुलकीमुळे अपर्णाताई देशमुख अक्षरशः भारावून गेल्या. त्यांच्या निवडीच्या निमित्ताने कडेपूरमध्ये निर्माण झालेला उत्साह हा देशमुख कुटुंबाशी असलेल्या कार्यकर्त्यांच्या जिव्हाळ्याचे आणि दीर्घकाळ जोपासलेल्या जनसंपर्काचे प्रतीक मानला जात आहे.
सहकार क्षेत्रातील नव्या जबाबदारीच्या निमित्ताने अपर्णाताई देशमुख यांच्या पुढील कार्याकडे आता जिल्ह्याचे लक्ष लागले असून, जिल्हा बँकेच्या माध्यमातून शेतकरी, महिला आणि सहकार क्षेत्राच्या प्रश्नांसाठी त्या कशा प्रकारे योगदान देतात, याबाबत अपेक्षा व्यक्त होत आहेत.
"स्वकीय विरोधाच्या प्रयत्नांवर मात; अखेर बिनविरोध निवड!
" जिल्हा बँकेच्या निवडणुकीत सर्वसाधारण महिला गटातून अपर्णाताई देशमुख यांनी उमेदवारी दाखल केली होती. त्यांना संचालकपदापासून दूर ठेवण्यासाठी काही स्वकीय राजकीय विरोधकांनी प्रयत्न केल्याची चर्चा होती. मात्र, मुख्यमंत्र्यांनी स्वतः हस्तक्षेप केल्याने त्यांच्या निवडीचा मार्ग सुकर झाला आणि त्यांची संचालकपदी बिनविरोध वर्णी लागली. त्यामुळे संग्रामसिंह देशमुख समर्थकांमध्ये आनंदाचे वातावरण निर्माण झाले आहे."
टिप्पणी पोस्ट करा
0टिप्पण्या