सावळज : दि. ४ : तासगाव तालुक्याच्या पूर्व भागातील अग्रणी नदीकाठी वसलेल्या सावळज (ता. तासगाव) येथील सावळज गावचे ग्रामदैवत श्री सावळसिध्द देवाची सालाबादप्रमाणे यात्रा शुक्रवार दि. ४ सप्टेंबर ते ६ सप्टेंबर या कालावधीत सुरू होत आहे या तीन दिवस भरणाऱ्या यात्रेसाठी महाराष्ट्र, कर्नाटक सह इतर राज्यातून हजारो भाविक सावळज मध्ये दाखल होत आहेत त्यामुळे सावळज सह संपूर्ण परिसरात भक्ती आणि उत्साहाचे वातावरण निर्माण झाले आहे .
सावळजचे ग्रामदैवत श्री सावळसिध्द हे सुमारे ४५० वर्षांपूर्वीचे हेमाडपंथीय बांधणीचे आकर्षक असे ऐतिहासिक मंदिर आहे या मंदिरातील श्री सावळसिध्द देवाची सहा फूट उंचीची एकसंघ शिळेची मूर्ती असून या मूर्तीची प्रतिष्ठापना समर्थ रामदास स्वामींच्या हस्ते झाल्याची आख्यायिका आहे देवाची मूर्ती ही मारुतीच्या रुद्रावतारातील असल्याने या देवाला सावळसिध्द उर्फ मारुतीची मूर्ती असेही म्हंटले जाते या ऐतिहासिक मूर्तीवर नुकताच वज्रलेप करण्यात आला आहे मंदिराच्या भोवती ऐतिहासिक असा उंच चिरेबंदी दगडी तट असून तटाला आकर्षक खिडकी असून या खिडकीतून बाहेरून थेट देवाचे दर्शन होते मंदिराचा सभामंडप हा लाकडी कोरीव नक्षीकाम केलेला असून प्रवेशद्वाराच्या वरती नगारखाना आहे परंपरेनुसार ही यात्रा दोन दिवस भरत असते परंतु भक्तांची वाढती गर्दी लक्षात घेऊन ही यात्रा ३ दिवस भरविण्याचा निर्णय यात्रा कमिटीने घेतला आहे यात्रेच्या मुख्य दिवशी श्रींच्या मूर्तीस विशेष पूजा अभिषेक आणि आरतीने यात्रेची सुरवात होत असते यानंतर पालखी सोहळा व भजन कीर्तनाचे आयोजन करण्यात येते यात्रेच्या प्रमुख दिवशी दर्शनासाठी अलोट गर्दी होत असते सायंकाळी नामवंत लोकनाट्य तमाशा तसेच जंगी निकाली कुस्त्यांचे मैदान भरविण्यात येणार आहे तर रात्री विशेष म्हणजे ऑर्केस्ट्राच्या कार्यक्रमाचे आयोजन करण्यात आले आहे तसेच या कालावधीत भाविकांची कोणतीही गैरसोय होऊ नये यासाठी चोख पोलीस बंदोबस्त तैनात करण्यात आला आहे.
टिप्पणी पोस्ट करा
0टिप्पण्या