कोयना धरणातून ३९८३, तर वारणा धरणातून ९०० क्युसेक विसर्ग सुरू ; पालकमंत्री चंद्रकांत पाटील यांच्या शब्दाला जलसंपदा मंत्री विखे पाटील यांचा तत्काळ प्रतिसाद

प्रतिष्ठा न्यूज 

सांगली, दि. 21 : जिल्ह्यातील पाणीटंचाईची संभाव्य परिस्थिती लक्षात घेऊन पालकमंत्री चंद्रकांत पाटील यांनी काल जलसंपदा मंत्री राधाकृष्ण विखे-पाटील यांच्याशी दूरध्वनीवरून संपर्क साधत सांगली जिल्ह्यासाठी कोयना धरणांतून विसर्ग वाढविण्याबाबत शब्द टाकला. पालकमंत्र्यांच्या या मागणीला जलसंपदा मंत्री यांच्याकडून तत्काळ प्रतिसाद मिळाला असून, कोयना धरणांतून विसर्ग वाढविण्यात आला आहे. कोयना धरणातून विसर्ग वाढवत आता ३९८३ क्युसेक विसर्ग सुरू करण्यात आला आहे. दरम्यान, वारणा धरणातूनही ९०० क्युसेक जलविसर्ग सुरू करण्यात आला आहे. त्यामुळे आगामी काळातील पाणीटंचाईची तीव्रता कमी होण्यास मदत होणार आहे.

            जिल्ह्यातील पाणीस्थितीचा आढावा घेण्यासाठी जिल्हाधिकारी कार्यालयात रविवारी झालेल्या बैठकीत पिण्याच्या पाण्याची उपलब्धता आणि आगामी काळातील संभाव्य पाणीटंचाईवर मात करण्यासाठी उपाययोजनांबाबत आढावा घेण्यात आला. यावेळी परिस्थितीचे गांभीर्य लक्षात घेऊन पालकमंत्री चंद्रकांत पाटील यांनी जलसंपदा मंत्री राधाकृष्ण विखे-पाटील यांच्याशी थेट दूरध्वनीवरून चर्चा केली. सांगली जिल्ह्यातील पिण्याच्या पाण्याची गरज लक्षात घेऊन, कोयना धरणातून विसर्ग वाढवण्याची गरज व्यक्त केली.

पालकमंत्र्यांनी केलेल्या या मागणीनंतर आजपासूनच कोयना धरणांतून विसर्ग वाढविण्यात आल्याने जिल्ह्याला मोठा दिलासा मिळाला आहे. या पाण्यामुळे पिण्याच्या पाण्याचे स्रोत भरून घेण्यास मदत होणार आहे.

  जिल्ह्यातील वारणा धरणात आज सकाळी 8 वाजेपर्यंत 34.40 टी.एम.सी. पाणीसाठा असून या धरणाची साठवण क्षमता 34.40 टी.एम.सी इतकी असल्याचे जपसंपदा विभागाने कळविले आहे.

            विविध धरणातील पाणीसाठा व साठवण क्षमता कंसात टी.एम.सी. प्रमाणात पुढीलप्रमाणे. कोयना 102.12 (105.25), धोम 12.73 (13.50), कन्हेर 9.97 (10.10), धोमबलकवडी 3.92 (4.08), उरमोडी 9.33 (9.97), तारळी 5.65 (5.85), वारणा 34.40 (34.40), राधानगरी 8.34 (8.36), दूधगंगा 25.33 (25.40), तुळशी 3.47 (3.47), कासारी 2.77 (2.77), पाटगांव 3.72 (3.72), अलमट्टी 115.55 (123).

            सांडवा, कालवा व विद्युतगृहाव्दारे विविध धरणातून सुरू असलेला विसर्ग क्युसेकमध्ये पुढीलप्रमाणे – कोयना धरणातून 3983, धोम 630, कण्हेर 40, धोम बलकवडी 505, उरमोडी 400, तारळी 285, वारणा 900, राधानगरी - निरंक, दुधगंगा 750 व अलमट्टी धरणातून 12 हजार 175 क्युसेक विसर्ग सुरू आहे.

            विविध पुलाच्या ठिकाणी पाण्याची आजची पातळी व कंसात इशारा पातळी फूटामध्ये पुढीलप्रमाणे आहे. आयर्विन पूल सांगली 5.9 (40) व अंकली पूल हरिपूर 5.2 (45.11).