“ताकारी-टेंभू रखडले;संजय काकांचा उद्या जलसंपदा कार्यालयावर शेतकऱ्यांसोबत ठिय्या”

प्रतिष्ठा न्यूज/किरण कुंभार 

तासगाव:तासगाव तालुक्यातील ताकारी व टेंभू उपसा सिंचन योजनांचे आवर्तन रखडल्यामुळे संपूर्ण परिसरात भीषण पाणीटंचाई निर्माण झाली असून, संतप्त शेतकऱ्यांनी आता आंदोलनाचा इशारा दिला आहे. माजी खासदार संजयकाका पाटील आणि युवा नेते प्रभाकर पाटील यांच्या नेतृत्वाखाली उद्या ३० मार्च २०२६ रोजी सकाळी १० वाजता तासगाव येथील जलसंपदा विभागाच्या उपविभागीय कार्यालयावर ‘ठिय्या आंदोलन’ छेडण्यात येणार आहे.

💧 पाणीटंचाईने शेतकरी हैराण

ताकारी आणि टेंभू योजनांच्या लाभक्षेत्रातील गावांमध्ये सध्या पाण्याचा तीव्र तुटवडा जाणवत आहे. मार्च महिना संपत आला तरी प्रशासनाने उन्हाळी आवर्तन सुरूच केले नाही, यामुळे शेतकऱ्यांमध्ये प्रचंड नाराजी पसरली आहे.

येरळा नदीचे पात्र पूर्णपणे कोरडे पडले असून, परिसरातील ऊस आणि द्राक्ष शेती संकटात सापडली आहे. द्राक्षबागांची छाटणी आणि उसासाठी अत्यावश्यक असलेले पाणी वेळेत न मिळाल्याने शेतकऱ्यांचे आर्थिक गणित कोलमडण्याची भीती व्यक्त केली जात आहे.

⚠️ नियम धाब्यावर; प्रशासनावर आरोप

जलसंपदा विभागाच्या नियमानुसार १ मार्चपासून आवर्तन सुरू होणे अपेक्षित होते, मात्र मार्च अखेर येऊन ठेपली तरी कोणतीही हालचाल दिसत नाही.

शेतकऱ्यांच्या म्हणण्यानुसार, हा प्रशासनाचा वेळकाढूपणा आणि हलगर्जीपणा असून, यामुळे शेवटच्या टोकाच्या गावांपर्यंत पाणी पोहोचायला उशीर होणार आहे. परिणामी शेती उत्पादनात मोठी घट होऊन कोट्यवधींचे नुकसान होण्याची शक्यता आहे.

📍 लाभक्षेत्रातील गावांमध्ये तीव्र संताप

ताकारी योजनेत मणेराजुरी, चिंचणी, पुणदी, भैरववाडी, उपळावी, मतकुणकी, वंजारवाडी, आळते, सोनी या गावांचा समावेश आहे.

तर टेंभू व विसापूर-पुणदी योजनेत मणेराजुरी, सावडे, बलगवडे, बस्तवडे, खुजगाव, वाघापूर, लोढे, कौलगे, डोर्ली, आरवडे, मांजडे, हातनूर, गोटेवाडी, हातनोली, धामणी, पाडळी, पेड, सावळज, चिंचणी या गावांचा समावेश आहे.

या सर्व गावांतील शेतकरी आता आंदोलनासाठी सज्ज झाले आहेत.

✊ ३० मार्चला ‘ठिय्या’—पाणी सोडा, नाहीतर संघर्ष तीव्र!

ताकारीच्या मुख्य कालव्यातून येरळा नदीत तात्काळ पाणी सोडण्याची मागणी करत हे आंदोलन छेडले जाणार आहे.शेतकऱ्यांना न्याय मिळेपर्यंत आंदोलन मागे न घेण्याचा इशाराही देण्यात आला आहे.