मजले येथ बिबट्याचा शेतकऱ्यावर हल्ला ; परिसरात भीतीचे सावट

प्रतिष्ठा न्यूज /अक्षय कोठावळे 

हातकणंगले : तालुक्यातील मजले परिसरात बिबट्याच्या वावरामुळे भीतीचे वातावरण निर्माण झाले असून, मंगळवारी दुपारी मजले–आळते रोडलगत पिराप्पा शेत परिसरात गवत कापत असलेल्या शेतकरी **रावसाहेब पाटील** यांच्यावर बिबट्याने अचानक हल्ला केल्याची घटना घडली. शेजारील शेतकऱ्यांनी वेळीच धाव घेतल्यामुळे मोठा अनर्थ टळला.

प्राथमिक माहितीनुसार, रावसाहेब पाटील हे दुपारच्या सुमारास शेतात गवत कापण्याचे काम करत होते. यावेळी दबा धरून बसलेल्या बिबट्याने त्यांच्या पाठीमागून अचानक झडप घातली. प्रसंगावधान राखत त्यांनी मोठ्याने आरडाओरडा केला. त्यांच्या आवाजाने शेजारील शेतकरी तातडीने घटनास्थळी धावून आले. ग्रामस्थांचा गोंधळ आणि आरडाओरडा होताच बिबट्याने तेथून पळ काढत समोरच्या उसाच्या शेतात आश्रय घेतल्याचे प्रत्यक्षदर्शींनी सांगितले.

स्थानिकांच्या म्हणण्यानुसार, काल रात्रीपासून मजले परिसरात बिबट्याचा वावर दिसून येत आहे. या काळात काही कुत्र्यांवरही हल्ला झाल्याच्या घटना समोर आल्या असून त्यामुळे परिसरातील शेतकरी, शेतमजूर आणि नागरिकांमध्ये भीतीचे वातावरण पसरले आहे.

घटनेची माहिती मिळताच वन विभागाची यंत्रणा तात्काळ घटनास्थळी दाखल झाली असून आवश्यक कार्यवाही सुरू करण्यात आली आहे. दरम्यान, मजले, नेज व आळते परिसरातील ग्रामस्थांनी वनविभागाने तातडीने बिबट्याचा शोध घेऊन परिसरात पिंजरा लावावा, नियमित गस्त घालावी आणि नागरिकांच्या सुरक्षिततेसाठी आवश्यक उपाययोजना कराव्यात, अशी मागणी केली आहे.

# नागरिकांना सतर्क राहण्याचे आवाहन

बिबट्याचा वावर लक्षात घेता नागरिकांनी शक्यतो शेतात एकटे जाऊ नये. सकाळी व सायंकाळी शेतात काम करताना विशेष खबरदारी घ्यावी. बिबट्या आढळल्यास त्याच्या जवळ जाण्याचा प्रयत्न न करता तात्काळ वनविभाग किंवा स्थानिक प्रशासनाला माहिती द्यावी, असे आवाहन करण्यात आले आहे.