पोदार इंटरनॅशनल स्कूलमध्ये 'केएससी युवा संसद २०२६' उत्साहात संपन्न

प्रतिष्ठा न्यूज / योगेश रोकडे 

सांगली : पोदार इंटरनॅशनल स्कूल अँड ज्युनियर कॉलेज, सांगली येथे कृष्णा सहोदया कॉम्प्लेक्स (KSC), सांगली यांच्या वतीने एकदिवसीय 'केएससी युवा संसद २०२६' या अभिरूप संसदेचे यशस्वी आयोजन करण्यात आले.

या उपक्रमात सांगली, सातारा, कोल्हापूर आणि रत्नागिरी जिल्ह्यातील १६ शाळांमधील ८० विद्यार्थ्यांनी उत्स्फूर्त सहभाग घेतला. विद्यार्थ्यांनी सत्ताधारी पक्ष व विरोधी पक्षातील खासदारांच्या भूमिका प्रभावीपणे साकारत संसदेचे वास्तवदर्शी वातावरण निर्माण केले. मतदारसंघ, राज्य, देश तसेच आंतरराष्ट्रीय घडामोडींवर सखोल चर्चा करत विद्यार्थ्यांनी लोकशाही प्रक्रियेचा अनुभव घेतला.

अभिरूप संसदेत 'नारी शक्ती वंदन अधिनियम' या महत्त्वपूर्ण विषयावर अभ्यासपूर्ण आणि मुद्देसूद चर्चा झाली. देशाचे अर्थकारण, आरोग्य, महिला आरक्षण, शिक्षण, व्यापार, मानव विकास निर्देशांक अशा विविध राष्ट्रीय विषयांवर विद्यार्थ्यांनी तर्कशुद्ध व प्रभावी मांडणी केली. संसदेतील चर्चेप्रमाणेच प्रभावी भाषणे, मुद्देसूद प्रतिवाद आणि मिश्कील टोलेबाजीमुळे कार्यक्रमात खऱ्या संसदीय वातावरणाची अनुभूती उपस्थितांना मिळाली.

कार्यक्रमाच्या उद्घाटनप्रसंगी प्रमुख पाहुणे म्हणून सांगली जिल्हा परिषदेचे उपमुख्य कार्यकारी अधिकारी श्री. शशिकांत शिंदे उपस्थित होते. मार्गदर्शन करताना त्यांनी ग्रामपंचायतीपासून संसदेपर्यंतच्या सर्व लोकशाही संस्थांचे महत्त्व अधोरेखित करत प्रत्येक नागरिकाने लोकशाही व्यवस्थेबाबत जागरूक राहण्याचे आवाहन केले.

समारोप व पारितोषिक वितरण समारंभासाठी प्रमुख पाहुणे म्हणून चिंतामणराव वाणिज्य महाविद्यालय, सांगलीचे प्राचार्य डॉ. सुरेश कुंभार उपस्थित होते. त्यांनी युवकांच्या सक्रिय सहभागामुळे लोकशाही अधिक सक्षम होत असल्याचे सांगून अशा उपक्रमांमुळे विद्यार्थ्यांचा दृष्टिकोन व्यापक होत असल्याचे नमूद केले.

यावेळी पोदार इंटरनॅशनल स्कूलचे प्राचार्य जी. बी. पाटील यांनी विद्यार्थ्यांना मार्गदर्शन करताना सांगितले की, "झेन झी' म्हणून ओळखल्या जाणाऱ्या आजच्या विद्यार्थ्यांनी अभिरूप संसदेत सत्ताधारी व विरोधी पक्षातील खासदारांच्या भूमिका समर्थपणे पार पाडल्या. या अनुभवातून लोकशाही मूल्ये, नेतृत्वगुण आणि जबाबदार नागरिकत्व आत्मसात करून त्यांचा उपयोग स्वतःच्या तसेच समाजाच्या विकासासाठी करावा." तसेच अशा उपक्रमांमुळे विद्यार्थी आणि पालकांमध्ये लोकशाही व राजकारणाविषयी सकारात्मक दृष्टिकोन निर्माण होईल, असा विश्वास त्यांनी व्यक्त केला.

स्पर्धेसाठी परीक्षक म्हणून डॉ. पतंगराव कदम महाविद्यालयाच्या राज्यशास्त्र विभागाच्या प्राध्यापिका डॉ. वंदना सातपुते आणि अथर्व जोशी यांनी काम पाहिले, तर विद्यालयाचा विद्यार्थी दक्ष सिन्हा याने सभापतीची भूमिका उत्कृष्टरीत्या निभावली.

उत्कृष्ट सादरीकरण करणाऱ्या विद्यार्थ्यांना 'संसदरत्न' पुरस्काराने गौरविण्यात आले. कार्यक्रमाच्या यशस्वी आयोजनासाठी पोदार इंटरनॅशनल स्कूलच्या शिक्षक व शिक्षकेत्तर कर्मचाऱ्यांनी मोलाचे योगदान दिले.