विज्ञान अध्यापन समृद्ध करणारी तीन दिवसीय प्रशिक्षण कार्यशाळा यशस्वी

प्रतिष्ठा न्यूज/योगेश रोकडे 

सांगली : मराठी विज्ञान परिषद, मुंबई, स्वातंत्र्यवीर सावरकर प्रतिष्ठान, सांगली आणि माध्यमिक शिक्षण विभाग, सांगली यांच्या संयुक्त विद्यमाने आयोजित "प्रयोगशाळा सहाय्यक आणि विज्ञान शिक्षक प्रशिक्षण कार्यशाळा" दि. २२, २३ व २४ जुलै २०२६ रोजी स्वातंत्र्यवीर सावरकर प्रतिष्ठान, सांगली येथे उत्साहात व यशस्वीरीत्या पार पडली.

कार्यशाळेच्या उद्घाटनप्रसंगी मा. विशाल दशवंत (माध्यमिक शिक्षणाधिकारी, जि. प. सांगली), मा. सुनील देशपांडे (समन्वयक, मराठी विज्ञान परिषद, सांगली जिल्हा) आणि मा. नामजोशी यांची प्रमुख उपस्थिती लाभली. तसेच मा. विशाल नरवडे (मुख्य कार्यकारी अधिकारी, जि. प. सांगली), मा. राजेश समेळ (मराठी विज्ञान परिषद, मुंबई) यांनीही मार्गदर्शन करून विज्ञान अध्यापन अधिक कृतीशील, परिणामकारक आणि विद्यार्थीकेंद्रित करण्यासाठी शिक्षकांना प्रेरित केले.

तीन दिवसांच्या या प्रशिक्षणात विविध वैज्ञानिक प्रयोग, प्रयोगामागील वैज्ञानिक संकल्पना, सुरक्षित प्रयोगपद्धती, प्रयोगशाळेतील साहित्याचा प्रभावी वापर आणि कृतीआधारित अध्यापनाच्या आधुनिक पद्धतींचे सखोल मार्गदर्शन करण्यात आले. प्रत्येक सत्र प्रत्यक्ष प्रात्यक्षिकांवर आधारित असल्याने सहभागी शिक्षक व प्रयोगशाळा सहाय्यकांना प्रत्यक्ष अनुभवातून शिकण्याची संधी मिळाली.

कार्यशाळेत मा. अनघा वक्ते, मा. चारुलता जुईकर, मा. अभय वावलकर, मा. राजेश समेळ आणि मा. साक्षी सावंत या तज्ज्ञ मार्गदर्शकांनी अत्यंत सोप्या, प्रभावी आणि प्रात्यक्षिकाधारित पद्धतीने विज्ञानातील विविध प्रयोगांचे सादरीकरण केले. त्यांच्या मार्गदर्शनामुळे विज्ञानातील संकल्पना अधिक स्पष्ट झाल्या आणि त्या शालेय अध्यापनात प्रभावीपणे वापरण्याचा आत्मविश्वास सहभागी शिक्षकांना मिळाला.

प्रशिक्षणादरम्यान वालचंद अभियांत्रिकी महाविद्यालयाचे प्रा. अनिल पोवार यांनी सदिच्छा भेट दिली. समारोपप्रसंगी प्रा. किरण मधाळे यांच्या हस्ते सहभागी शिक्षकांना प्रमाणपत्रांचे वितरण करण्यात आले.

या कार्यशाळेमुळे कमी खर्चात सहज उपलब्ध साहित्याचा वापर करून विद्यार्थ्यांमध्ये वैज्ञानिक दृष्टिकोन, जिज्ञासा आणि प्रयोगशीलता विकसित करण्यासाठी अनेक उपयुक्त कल्पना, प्रयोग आणि अध्यापन कौशल्ये आत्मसात करता आली. सहभागी शिक्षकांमधील अनुभवांची देवाणघेवाण, प्रयोगशाळा सहाय्यकांचे सहकार्य आणि आयोजकांचे उत्कृष्ट नियोजन यामुळे ही कार्यशाळा अत्यंत समृद्ध व प्रेरणादायी ठरली.

या ज्ञानवर्धक कार्यशाळेच्या यशस्वी आयोजनासाठी परिश्रम घेतलेल्या सर्व मान्यवर, तज्ज्ञ मार्गदर्शक, प्रयोगशाळा सहाय्यक श्री. उत्तम मंगल तसेच आयोजक समितीच्या सर्व सदस्यांचे सहभागी शिक्षकांनी मनःपूर्वक आभार मानले. तसेच प्रशिक्षणात सहभागी होण्यासाठी सहकार्य व प्रोत्साहन दिल्याबद्दल मुख्याध्यापक मा. श्री. डी. एन. पाटील यांच्याप्रती विशेष कृतज्ञता व्यक्त करण्यात आली.

या प्रशिक्षणातून मिळालेले ज्ञान व अनुभव विद्यार्थ्यांमध्ये वैज्ञानिक दृष्टिकोन, संशोधनवृत्ती आणि प्रयोगशीलता विकसित करण्यासाठी निश्चितच उपयुक्त ठरणार असून, भविष्यातही अशा दर्जेदार व उपयुक्त प्रशिक्षण कार्यशाळांचे सातत्याने आयोजन व्हावे, अशी अपेक्षा सहभागी शिक्षकांनी व्यक्त केली.