नूतन मराठी विद्यामंदिरात जागतिक योग दिन उत्साहात साजरा

सांगली, प्रतिनिधी : यंगमेन्स मॉडेल एज्युकेशन सोसायटी, सांगली संचलित शेठ र. वि. गो. नूतन मराठी विद्यामंदिर, सांगली येथे रविवार दि. २१ जून २०२६ रोजी जागतिक योग दिन मोठ्या उत्साहात आणि आनंदी वातावरणात साजरा करण्यात आला.

कार्यक्रमाच्या प्रारंभी प्रभारी मुख्याध्यापक श्री. प्रल्हाद मलमे यांनी प्रास्ताविक करून योगाचे महत्त्व विद्यार्थ्यांना पटवून दिले. त्यानंतर सौ. स्मिता चव्हाण यांनी जागतिक योग दिनाचा इतिहास, उद्दिष्टे तसेच योगामुळे होणारे शारीरिक व मानसिक फायदे याविषयी मार्गदर्शन केले.

योग दिनाच्या उपक्रमाची सुरुवात प्रभारी मुख्याध्यापक श्री. मलमे यांनी विद्यार्थी व शिक्षकांचे वॉर्मअप करून केली. त्यानंतर क्रीडाशिक्षक श्री. नितीन पारधी यांनी शाळेच्या बँडपथकाच्या तालावर विद्यार्थी व शिक्षकांकडून विविध कवायती करून घेतल्या.

कार्यक्रमाचे विशेष आकर्षण ठरली इयत्ता पाचवीतील विद्यार्थिनी व योगप्रेमी कु. सौम्या चौगुले. तिने विविध योगासने व त्यांची प्रात्यक्षिके सादर केली. तिच्या मार्गदर्शनाखाली विद्यार्थी व शिक्षकांनीही अचूकपणे योगासने केली. यावेळी सौ. स्मिता चव्हाण यांनी विविध योगासनांची नावे आणि त्यांचे आरोग्यदायी फायदे यांची माहिती दिली.

यानंतर सौ. अनिता जानकर यांच्या नियोजनातून संगीताच्या तालावर विद्यार्थी व शिक्षकांनी उत्साहपूर्ण झुंबा नृत्य सादर करून कार्यक्रमात रंगत आणली. संपूर्ण कार्यक्रमाचे आकर्षक व्हिडिओ चित्रीकरण संगणक तज्ञ शिक्षक श्री. विनायक माळी यांनी केले.

कार्यक्रमाची सांगता श्रीमती माधुरी कुंभार यांनी उपस्थित विद्यार्थी, शिक्षक, शिक्षकेतर कर्मचारी तसेच सहकार्य करणाऱ्या सर्वांचे आभार मानून केली.

या कार्यक्रमाच्या यशस्वी आयोजनासाठी सौ. सुनिता संकपाळ, कु. नेहा चिखले व सौ. मुलानी यांनी विशेष योगदान दिले. विद्यार्थ्यांच्या उत्स्फूर्त सहभागामुळे आणि शिक्षकांच्या सहकार्यामुळे शाळेत जागतिक योग दिन आनंदी, प्रेरणादायी व उत्साहपूर्ण वातावरणात साजरा झाला.