२२७ वर्षांच्या प्रतीक्षेनंतर सेनापती परशुरामभाऊंचा इतिहास येणार उजेडात;

प्रतिष्ठा न्यूज/किरण कुंभार 

तासगाव:मराठा साम्राज्याचे पराक्रमी सेनापती, तासगावचे भूषण आणि सुप्रसिद्ध श्री गणपती मंदिराचे संस्थापक श्रीमंत परशुरामभाऊ पटवर्धन यांच्या जीवनकार्याला शब्दबद्ध करणाऱ्या चरित्रग्रंथाच्या मुखपृष्ठाचे अनावरण सोमवारी विनायकी चतुर्थीच्या पावन मुहूर्तावर तासगाव येथील ऐतिहासिक श्री गणपती मंदिरात उत्साहपूर्ण वातावरणात पार पडले. महेश शांताराम कदम लिखित या चरित्रग्रंथाच्या मुखपृष्ठाचे अनावरण ज्येष्ठ गणेशभक्त व इतिहासप्रेमी प्रभाकर आण्णा गोसावी यांच्या शुभहस्ते करण्यात आले.यावेळी मंदिर परिसरात इतिहास,परंपरा आणि भावनांचा अनोखा संगम पाहायला मिळाला.कार्यक्रमाच्या प्रारंभी सेनापती परशुरामभाऊंच्या सातव्या पिढीचे प्रतिनिधी आणि श्री गणपती मंदिराचे प्रमुख विश्वस्त राजेंद्र परशुराम पटवर्धन यांनी उपस्थितांचे स्वागत करत लेखक महेश कदम आणि प्रमुख पाहुणे प्रभाकर आण्णा गोसावी यांचा परिचय करून दिला.यावेळी बोलताना राजेंद्र पटवर्धन यांनी अत्यंत भावनिक शब्दांत खंत व्यक्त केली.“भारतीय इतिहासातील इतक्या मोठ्या विभूतीचे चरित्र त्यांच्या निधनानंतर तब्बल २२७ वर्षे प्रसिद्ध होऊ शकले नाही, ही आमच्यासाठी वेदनादायी बाब आहे,” असे सांगताना त्यांनी आपल्या घराण्याची अपराधी भावना व्यक्त केली.त्यांनी पुढे सांगितले की, परशुरामभाऊंच्या सहवासात काही महिने राहिलेल्या एका इंग्रज लष्करी अधिकाऱ्याने भाऊ जिवंत असतानाच त्यांच्यावर चरित्र प्रकाशित केले होते; मात्र त्यांच्या स्वतःच्या वारसांकडून हे कार्य इतक्या वर्षांनंतर पूर्ण होत असल्याची विसंगती अत्यंत क्लेशदायक असल्याचे त्यांनी नमूद केले.लेखक महेश कदम यांनी आपल्या मनोगतात इतिहास, गड-किल्ले आणि विस्मृतीत गेलेल्या व्यक्तिमत्त्वांचा अभ्यास करण्याची आवड लहानपणापासून कशी जपली याचे अनुभव कथन केले. पोलिस दलातील जबाबदाऱ्या सांभाळत असतानाही इतिहास संशोधनाची ज्योत कायम ठेवून हे कार्य पूर्ण केल्याचे त्यांनी सांगितले.

प्रमुख पाहुणे प्रभाकर आण्णा गोसावी यांनी आपल्या भाषणात श्री गणपती मंदिराशी असलेली ८० वर्षांहून अधिक काळाची नाळ उलगडली.“या मंदिरात दररोज दर्शन घेताना मिळणारी शांती आणि समाधान हे परशुरामभाऊंनी निर्माण केलेल्या या पवित्र स्थळामुळेच आहे,” असे सांगत त्यांनी २४७ वर्षांच्या या ऐतिहासिक देवस्थानाचे महत्त्व अधोरेखित केले.

या प्रसंगी श्री गणपती मंदिर न्यासाच्या वतीने प्रणित सुतार यांना त्यांच्या ‘स्पीड झेरॉक्स’ व्यवसायस्थळी प्रदर्शित करण्यासाठी परशुरामभाऊंचे छायाचित्र भेट देण्यात आले.कार्यक्रमाचे नियोजन प्रमुख मंदिर व्यवस्थापक पवनसिंह कुडमल, सहव्यवस्थापक अथर्व जोशी, तसेच रंजित चव्हाण, प्रतीक प्रसन्न गोसावी, समीर संतोष यादव आणि राजेंद्र पाटील यांनी केले.

तासगावच्या ऐतिहासिक भूमीत, गणरायाच्या साक्षीने झालेल्या या अनावरण सोहळ्यामुळे सेनापती परशुरामभाऊ पटवर्धन यांच्या पराक्रमाचा इतिहास नव्या पिढीसमोर पुन्हा जिवंत झाला,अशी भावना उपस्थितांनी व्यक्त केली.