"तहसीलच्या उंबरठ्यावरची धावपळ थांबली; मांजर्डे महसूल शिबिरात हजारो नागरिकांची कामे जागेवरच निकाली"

प्रतिष्ठा न्यूज/किरण कुंभार 

तासगाव:महाराष्ट्र शासनाच्या महसूल व वन विभागाच्या वतीने राबविण्यात येत असलेल्या "छत्रपती शिवाजी महाराज महसूल समाधान शिबिर अभियान" अंतर्गत तासगाव तालुक्यातील **मांजर्डे मंडळ मुख्यालयात आयोजित करण्यात आलेल्या महसूल शिबिराला नागरिकांचा उत्स्फूर्त प्रतिसाद मिळाला.सकाळी १० वाजल्यापासून सुरू झालेल्या या शिबिरात परिसरातील हजारो नागरिकांनी उपस्थित राहून महसूल विभागाशी संबंधित विविध प्रलंबित कामे पूर्ण करून घेतली.

या शिबिराला आमदार सुहास बाबर यांनी भेट देत नागरिकांशी थेट संवाद साधला.गावपातळीवर महसूल सेवा उपलब्ध करून देण्याच्या या उपक्रमामुळे सामान्य नागरिकांना तहसील कार्यालयाच्या फेऱ्यांपासून दिलासा मिळत असल्याचे त्यांनी सांगितले. यावेळी सातबारा उतारे, वारस नोंदी, फेरफार, नोंदीतील दुरुस्ती, लक्ष्मीमुक्ती योजनेअंतर्गत नोंदणी, तसेच विविध दाखल्यांचे वाटप अशा अनेक सेवा नागरिकांना देण्यात आल्या. शेतकऱ्यांच्या महसूल विषयक प्रलंबित प्रश्नांवरही तत्काळ मार्ग काढण्याचा प्रयत्न करण्यात आला.यावेळी तहसीलदार अतुल पाटोळे यांनी सांगितले की, "शासन आपल्या दारी" या संकल्पनेतून महसूल विभागाच्या सेवा थेट गावपातळीवर पोहोचविण्यात येत असून त्यामुळे नागरिकांची कामे अधिक जलदगतीने पूर्ण होत आहेत. नागरिकांनी तहसील कार्यालय, मंडळ अधिकारी किंवा ग्राम महसूल अधिकारी स्तरावर प्रलंबित असलेल्या अर्ज व तक्रारी निदर्शनास आणून द्याव्यात, असे आवाहनही त्यांनी केले.आमदार बाबर यांनी या उपक्रमाचे कौतुक करत महसूल विभागाच्या अधिकाऱ्यांचे अभिनंदन केले.शासनाच्या योजनांचा लाभ शेवटच्या घटकापर्यंत पोहोचविण्यासाठी अशा शिबिरांची आवश्यकता असल्याचे त्यांनी नमूद केले.

या प्रसंगी जि.प.सदस्य मोहन पाटील,पंचायत समिती सदस्य प्रमोद शेंडगे,विद्याराणी चव्हाण, माजी सभापती कमल पाटील, संभाजी मंडले, संध्याराणी मंडले, सचिन पाटील, संजय पाटील, महेश खराडे यांच्यासह नायब तहसीलदार धनश्री स्वामी, प्रियंका माळी, मंडळ अधिकारी सुहास औताडे, ग्राम महसूल अधिकारी प्रविणा घोडके, प्रगल्भा कल्लनावर, संगीता पाटील, आनंद पाटील, वैभव पाटील आणि बहुसंख्य नागरिक उपस्थित होते.मांजर्डे येथे पार पडलेल्या या शिबिरामुळे महसूल सेवा थेट गावात उपलब्ध झाल्याने नागरिकांनी समाधान व्यक्त केले असून, शासनाचा हा उपक्रम सर्वसामान्यांसाठी दिलासादायक ठरत असल्याची भावना उपस्थितांनी व्यक्त केली.